Тошкент вилояти махсус комиссиясининг топшириғига мувофиқ, 15 сентябрдан бошлаб Тошкент вилоятида йўналишли такси йўналишларида Damas русумли енгил автомобиллар қатновини қайта тиклашга рухсат берилди. Бу ҳақда вилоят ҳокимлиги матбуот хизмати хабар берди.
Бунда бир қатор санитария ва меъёрий ҳужжатларга риоя этилиши талаб этилади:
- ҳар қатновга чиқишдан олдин ҳайдовчи ва чиптачиларнинг тана ҳарорати пирометрларда ўлчаниб, 37 даража ва ундан юқори бўлган ҳолатда уларнинг транспорт воситасини бошқаришига йўл қўймаслик;
- ҳайдовчиларнинг тиббий ниқоб ва қўлқопда бўлишини ҳамда транспорт воситаси салонида ҳайдовчи ўриндиғи йўловчилар ўриндиғидан шаффоф пластик ёки махсус плёнка билан тўсилган ҳолда бўлишини таъминлаш;
- йўловчиларнинг тиббий ниқобда бўлишини назорат қилиш, тиббий ниқоби бўлмаган ҳолатда уларнинг транспортга чиқишига йўл қўймаслик;
- транспорт воситасини доимий равишда ҳар қатновга чиқишдан олдин тўлиқ дезинфекциядан ўтказиш;
- санитар ишлов берилмаган, техник кўрикдан ўтмаган, техник носоз транспорт воситасини ишга чиқарилишини қатъиян та’қиқлаш.
Бунда ҳар бир транспорт воситалари лицензия варақалари билан тўлиқ таъминланган бўлиши шарт.
Тошкент вилояти транспорт бошқармаси Damas’ларда йўловчи ташувчи корхоналар ҳайдовчилари томонидан ҳаракат жадвалига риоя этмаслик, йўналиш схемасига амал қилмаслик, карантин қоидаларига риоя этмаслик ҳолатлари аниқланган ҳолларда, корхона раҳбари ва уларнинг ҳайдовчиларига нисбатан қонунчиликда белгиланган тартибда чоралар кўрилиши ҳақида огоҳлантирган.
Эслатиб ўтамиз, Республика махсус комиссиясининг навбатдаги қарори билан 5 сентябрдан бошлаб йўналишли таксида («маршрутка») йўловчи ташиш фаолиятига рухсат берилганди.
Изоҳ (0)