15 сентябрь куни Тошкент шаҳридаги «Ғалаба» боғи ҳудудида Бош прокуратура Академияси магистратурасига кириш ёзма имтиҳони бўлиб ўтди. Коронавирус пандемияси муносабати билан имтиҳон ўтказиладиган жойга киришдан олдин номзодларнинг тана ҳарорати ўлчаниб, тиббий қўлқоп, ниқоб, канцелярия жиҳозлари ва сув билан таъминланди.
Имтиҳон очиқ ва шаффоф ўтказилиши учун чет тили бўйича тест саволларини тузиш, имтиҳонни ўтказиш ва жавобларини баҳолашга Давлат тест маркази жалб қилинди. Кузатувчи ва имтиҳон жавобларини текширишда мутахассис сифатида турли таълим муассасалари, жамоат ташкилотлари ва бошқа идоралар вакиллари таклиф этилган. Академия расмий сайтида эълон қилинган имтиҳон материаллари асосида тузилган билетлар автоматик тарзда электрон генерация қилинди. Ҳар бир номзодга индивидуал идентификацион рақам берилиб, имтиҳон жавоблари тўлиқ шифрланди.
2020/2021-ўқув йилига магистратуранинг Прокурорлик фаолияти, Тергов фаолияти ва Коррупцияга қарши курашиш мутахассисликлари бўйича жами 30 та қабул квотаси тасдиқланган бўлиб, танлов ҳар бир ўрин учун 10 нафар номзодни ташкил этди. Ёзма имтиҳон чет тили бўйича тест саволлари ва ҳуқуқий мавзудаги эсседан иборат бўлди. Магистратурага танлов Юриспруденсия йўналиши бўйича олий юридик маълумотга эга шахслар, жумладан прокуратура органлари ходимлари орасида ўтказилди.
Эссе мавзулари жиноят ҳуқуқи, жиноят-процессуал ҳуқуқи, фуқаролик ҳуқуқи ва фуқаролик-процессуал ҳуқуқи каби фанлардан тузилган бўлиб, номзод ўз билим ва қобилиятларини тўлақонли намоён этиши учун таклиф этилган саволлар орасидан ўзига энг яқин бўлган мавзуни танлаш имкониятига эга эди. Миллий сертификат ёки халқаро сертификатларнинг В2 даражасига эга бўлган номзодларга чет тилидан имтиҳонсиз максимал балл берилади.
Имтиҳон жараёни Академиянинг Facebookдаги расмий саҳифасида онлайн намойиш қилинган. Эссе мавзулари, билетлар, суҳбат саволлари, шунингдек, абитуриентлар рўйхати ва уларнинг имтиҳонга кириш вақтлари Академия расмий веб-сайтида олдиндан эълон қилинган.
Кириш имтиҳонининг суҳбат шаклидаги иккинчи босқичининг ўтказилиш вақти қўшимча тарзда маълум қилинади.
Изоҳ (0)