Toshkent viloyati maxsus komissiyasining topshirig‘iga muvofiq, 15-sentabrdan boshlab Toshkent viloyatida yo‘nalishli taksi yo‘nalishlarida Damas rusumli yengil avtomobillar qatnovini qayta tiklashga ruxsat berildi. Bu haqda viloyat hokimligi matbuot xizmati xabar berdi.
Bunda bir qator sanitariya va me’yoriy hujjatlarga rioya etilishi talab etiladi:
- har qatnovga chiqishdan oldin haydovchi va chiptachilarning tana harorati pirometrlarda o‘lchanib, 37 daraja va undan yuqori bo‘lgan holatda ularning transport vositasini boshqarishiga yo‘l qo‘ymaslik;
- haydovchilarning tibbiy niqob va qo‘lqopda bo‘lishini hamda transport vositasi salonida haydovchi o‘rindig‘i yo‘lovchilar o‘rindig‘idan shaffof plastik yoki maxsus plyonka bilan to‘silgan holda bo‘lishini ta’minlash;
- yo‘lovchilarning tibbiy niqobda bo‘lishini nazorat qilish, tibbiy niqobi bo‘lmagan holatda ularning transportga chiqishiga yo‘l qo‘ymaslik;
- transport vositasini doimiy ravishda har qatnovga chiqishdan oldin to‘liq dezinfeksiyadan o‘tkazish;
- sanitar ishlov berilmagan, texnik ko‘rikdan o‘tmagan, texnik nosoz transport vositasini ishga chiqarilishini qat’iyan ta’qiqlash.
Bunda har bir transport vositalari litsenziya varaqalari bilan to‘liq ta’minlangan bo‘lishi shart.
Toshkent viloyati transport boshqarmasi Damas’larda yo‘lovchi tashuvchi korxonalar haydovchilari tomonidan harakat jadvaliga rioya etmaslik, yo‘nalish sxemasiga amal qilmaslik, karantin qoidalariga rioya etmaslik holatlari aniqlangan hollarda, korxona rahbari va ularning haydovchilariga nisbatan qonunchilikda belgilangan tartibda choralar ko‘rilishi haqida ogohlantirgan.
Eslatib o‘tamiz, Respublika maxsus komissiyasining navbatdagi qarori bilan 5-sentabrdan boshlab yo‘nalishli taksida (“marshrutka”) yo‘lovchi tashish faoliyatiga ruxsat berilgandi.
Izoh (0)