Фавқулодда вазиятлар вазирлиги Қорақалпоғистоннинг Қўнғирот тумани Фавқулодда вазиятлар бўлими бошлиғи подполковник Куанишбай Акимов ва Хоразм вилояти Қўшкўпир тумани Фавқулодда вазиятлар бўлими бошлиғи майор Дониёр Жабборов коронавирус асоратларидан вафот этганини хабар қилганди. Шунингдек, Хоразм вилояти 1-сон клиник шифохонаси шифокори Бахтиёр Қиличев коронавирус инфекцияси асоратларидан вафот этгани ҳақида хабар берилганди. Соғлиқни сақлаш вазирлиги Қўнғирот тумани ФВБ бошлиғининг вафотига коронавирус сабаб бўлганини тасдиқлаган эди. Аммо вазирлик Хоразм вилоят Соғлиқни сақлаш бошқармасига таянган ҳолда Хоразмда вафот этган Дониёр Жабборов ҳамда Бахтиёр Қиличевда коронавирус инфекцияси тасдиқланмаганини маълум қилди.

Майор Дониёр Жабборов.

Фото: ФВВ матбуот хизмати

«Қўшкўпир тумани Фавқулодда вазиятлар бўлими бошлиғи майор Д.Ж. 12 сентябрь куни коронавирус асоратлари туфайли вафот этгани ўз исботини топмади. Коронавирусга гумон қилиниб, шифохонага ётқизилган марҳум бемордан 10 сентябрь куни олинган махсус лаборатория таҳлили натижаларига кўра, унда коронавирусни келтириб чиқарувчи SARS CoV-2 вируси аниқланмаган», — дейилади ССВ хабарида.

«Дарё» интернет-нашри томонидан Ўзбекистонда коронавирус қурбони бўлганларнинг рўйхати юритиб борилади, ФВВ ахборотидан сўнг Дониёр Жабборов ҳам ушбу рўйхатга киритилган. Хоразм вилояти ССБ унда коронавирус аниқланганини рад этган бўлса-да, Дониёр Жабборовнинг ўлимидан кейин расмийлаштирилган дастлабки ҳужжатда у шифохонага ётқизилганда COVID-19 ва икки томонлама пневмония ташхиси қўйилгани қайд этилган (Ушбу ҳужжат нусхаси «Дарё» ихтиёрида бор). Шу сабабли «Дарё» нашри Дониёр Жабборовни коронавирус қурбонлари рўйхатида қолдиришга қарор қилди.

«Шунингдек, ижтимоий тармоқларда коронавирусдан вафот этгани айтилган хивалик шифокор Б.Қ.нинг Урганч шаҳар тиббиёт бирлашмасига қарашли карантин шифохонасидан олинган касаллик тарихи маълумотларига кўра, марҳумда коронавирус инфекцияси тасдиқланмаган», — дейилади вазирлик хабарида.

Фото: «Xabar.uz»

Вазирлик томонидан билдирилишича, 27 август куни касалхонага ётқизилган беморда бирламчи текширув жараёнида махсус лаборатория текширувида ҳам, кейинги ташхисларда ҳам коронавирус инфекцияси аниқланмаган. Беморнинг ўлимдан кейинги ташхиси натижаларига кўра, беморнинг вафотига икки томонлама пневмония сабаб бўлган.

Эслатиб ўтамиз, Президент Шавкат Мирзиёев «ҳақиқий ҳолат бўйича рақамларни яширишга уриниш жиноий жавобгарликкача бўлган қатъий чораларга олиб келиши мумкин»лигидан огоҳлантирганди.