Ўзбекистонга коронавирусга қарши курашда ёрдам бериш учун 16 август куни келган 40 нафар россиялик шифокорнинг миссияси ниҳоясига етди. ССВ матбуот хизматининг хабар беришича, 15 сентябрь куни уларни кузатиш маросими бўлиб ўтди.
Реаниматолог, пулмонолог, инфекционист, вирусолог, кардиолог, эндокринолог каби мутахассислар бир ой давомида коронавирусга чалинган беморларни даволаш муассасаларида Ўзбекистондаги шифокорлар билан ҳамкорликда иш олиб борди.
Эпидемиология, микробиология ва юқумли касалликлар илмий текшириш институти, Вирусология илмий текшириш институти клиникалари, Зангиота туманидаги юқумли касалликлар шифохонасида коронавирусга чалинган аҳволи оғир беморларни даволашда иштирок этиш билан биргаликда Ўзбекистоннинг барча вилоятларидаги юқумли касалликларни даволашга ихтисослашган шифохоналарда шифокорлар билан елкама-елка фаол иш олиб бориб, минг нафардан зиёд беморга тиббий ёрдам кўрсатди.
Россиялик мутахассислар қизил ҳудудларда фаолият юритиш билан бир қаторда видеоконференцалоқа орқали беморларни даволаш бўйича зарур тиббий маслаҳатлар берди, тиббиёт ходимлари учун вебинарлар ўтказиб, даволаш протоколларини мукаммаллаштириш мақсадида ўз тавсиялари билан бўлишди.
«Ўзбекистонлик ҳамкасбларимиз ҳам бу соҳада етарлича тажриба тўплаганликларини намоён қилдилар, улар билан биргаликда вирусни енгиш йўлида олиб борган ҳамкорликдаги саъй-ҳаракатларимиз ўз самарасини беради, деган умиддамиз», — деган Н.I. Пирогов номидаги миллий тиббий хирургия маркази реаниматолог-анестезиолог шифокори Владимир Кокуев.
Хабарда айтилишича, Ўзбекистондаги бир ойлик миссиясини самарали олиб боргани учун делегация раҳбари бўлмиш Россияда хизмат кўрсатган шифокор, тиббиёт фанлари доктори, профессор Михаил Замятинга «Ўзбекистон Республикаси Соғлиқни сақлаш аълочиси» кўкрак нишони ҳамда Республика шошилинч тиббий ёрдам илмий маркази фахрий профессори унвони топширилди.
Эслатиб ўтамиз, Ўзбекистонга шу вақтгача коронавирусга қарши курашда ёрдам беришда россиялик шифокорлардан ташқари кореялик профессор — эпидемиолог Сой Чже Ук, яна бир кореялик анестезиолог-реаниматолог, 15 нафар хитойлик шифокор ва тиббиёт мутахассисидан иборат гуруҳ, бир қанча туркиялик мутахассислар, Германиянинг етакчи тиббиёт мутахассисларидан бўлмиш профессор Вернер Бер фаолият юритган.
Изоҳ (0)