Андижон вилоятининг Пахтаобод тумани ва Хонобод шаҳри ҳокимлари пневмония билан касалланган ва 15 кундан бери ишга чиқмаган. Бу ҳақда «Халқ сўзи online» хабар берди.
Қайд этилишича, Андижон вилоятининг Пахтаобод тумани ҳокими Маҳмуджон Бозоров ва Хонобод шаҳар ҳокими Мусахон Мамадалиевларнинг 15 кундан буён ишга чиқмаётганлиги жамоатчилик эътиборини тортди.
«Дарё» мухбирининг аниқлик киритишича, Хонобод шаҳар ҳокими сўнгги маротаба 2020 йил 9 сентябрь куни вилоят прокурори ўринбосари Бахтиёр Худойбердиев иштирокидаги ёшлар ҳамда «темир дафтар»га киритилган аҳоли бандлигини таъминлаш ва уларга ижтимоий ёрдам кўрсатиш мақсадида ўтказилган учрашувда кўриниш берган.
Андижон вилоят ҳокимлиги мутасаддилари ва вилоят соғлиқни сақлаш бошқармасидаги манбаларнинг маълумот беришича, Мусахон Мамадалиев саломатлиги туфайли ишга чиқмаяпти. Шаҳар ҳокими саломатлигини тиклаш мақсадида уч кундан ортиқ муддат давомида ўз уйида даволанган. 2020 йил 14 сентябрдан бошлаб эса, у Республика ихтисослаштирилган кардиология илмий-амалий тиббиёт маркази Андижон филиалида пневмония касаллигидан даволанмоқда. Тиббиёт ходимларининг қайд этишича, унда коронавирус аломатлари топилмаган.
Шунингдек, август ойи охирларидан бошлаб Пахтаобод тумани ҳокими Маҳмуджон Бозоровнинг ҳам ишга чиқмаётганлиги ҳақида хабарлар тарқала бошлаган. Ушбу хабарлар юзасидан туман ҳокимлиги ахборот хизмати туман ҳокими пневмония хасталигидан даволанаётганлигини маълум қилган.Маълум қилинишича, Маҳмуджон Бозоровда касалликнинг дастлабки аломатлари пайдо бўла бошлагач гумонланувчи сифатида вилоят Юқумли касалликлар шифохонасига ётқизилган. Текширувлар натижаси унда пневмония хасталиги мавжудлигини кўрсатган ва даволанишни бошлаган. Айни дамда эса олиб борилган муолажалар натижасида соғлиғи тикланган.
Эслатиб ўтамиз, Қашқадарё вилоятининг Миришкор тумани ҳокими Ғайрат Бегалиев 8 сентябрь куни коронавирус асоратлари оқибатида вафот этганди. Июль ойида эса Қорақалпоғистон Республикаси Қонликўл тумани ҳокими Даулет Толибаев коронавирус билан касалланиб, вафот этганди.
Изоҳ (0)