Соғлиқни сақлаш вазирлигининг ўқув-тарбия муассасалари бўйича бош мутахассиси, тиббиёт фанлари доктори Инобат Аҳмедова агар ўқувчи ёки ўқитувчида коронавирус аниқланса, касаллик кенг тарқалмаслиги учун қандай чора-тадбирларни амалга ошириш зарурлиги ҳақида маълумот берди.
Унинг таъкидлашича, ўқувчиларни мактабга қабул қилишда масъул ходим уларнинг оила аъзолари саломатлиги, оилада юқумли касаллик билан оғриган ёки клиник белгилари намоён бўлаётганлар бор ёки йўқлигини (тана ҳароратининг 37 даражадан ошиши, кўнгил айниши, йўтал ва бошқа белгилар) текшириши мақсадга мувофиқ.
Агар ўқувчи ёки ўқитувчи мактабда ўзини яхши ҳис қилмаса, унда COVID-19’нинг одатий аломатлари бўлса, бошқа одамлардан алоҳидалаш керак. Вирус юқтирган ўқитувчи ёки ўқувчи билан алоқада бўлган барча юзалар, шу жумладан, барча сиртлар ва буюмлар, ҳожатхоналар, эшик тутқичлари ва телефонларни тозалаш керак. Тозалаш учун дезинфекциялаш воситаларидан фойдаланиш тавсия этилади.Ўқувчи ёки ўқитувчининг аҳволи ёмонлашса, (тана ҳарорати кўтарилса, ЎРВИ аломатлари аниқланса), изоляторга жойлаштирилади. Изолятор хонаси бўлмаган тақдирда ўқувчи ёки ўқитувчи ҳамширанинг кабинетига ёки изоляция учун мўлжалланган бошқа хонага жойлаштирилади. Шифокорга мурожаат қилиш ва ҳудудий СЭОМга маълум қилиш керак бўлади.
Мавзуга доир: Ўзбекистонда юзлаб ўқитувчиларда коронавирус аниқланмоқда. Лекин ССВ барча ҳолатларни ҳам расмий статистикага киритмаяпти
Бир марталик қоғоз сочиқлардан фойдаланиш тавсия этилади. Қоғоз сочиқлар, бир марта ишлатиладиган салфеткалар билан таъминлаш имконияти бўлмаган тақдирда ҳар куни ўзгартириладиган ва бир-биридан 25-30 сантиметр узоқликдаги масофада осилган, қайта ишлатиладиган индивидуал сочиқлардан фойдаланиш талаб этилади.
«Машғулотлар вақтида гуруҳларда ўқувчилар орасидаги масофани таъминлаш ўқувчи ва ўқитувчилар ўртасида узоқ муддатли тўғридан-тўғри жисмоний алоқалар чекланади ҳамда машғулотлар давомида турли гуруҳлардаги ўқувчиларнинг ўзаро алоқаси ва аралашишига йўл қўйилмайди», — дейди мутахассис.
Инобат Аҳмедова хасталикка чалинган ёки сурункали касаллиги бор ўқувчиларга онлайн таълим олиш тавсия этилишига ҳам тўхталиб ўтган.
Шифокорнинг қайд этишича, бу ҳолатда боланинг саломатлик кўрсаткичларига эътибор берилади. Бу кўрсаткичлар 5 та гуруҳга бўлинади.
- 1-гуруҳ. Бунга сурункали касалликларга чалинмаган, текшириш пайтида бирор-бир касаллик аниқланмаган ва ўз ёшига мувофиқ жисмоний ҳамда ақлий жиҳатдан ривожланган соғлом болалар киради.
- 2-гуруҳ. Сурункали касаллиги бўлмаган, лекин айрим морфофункционал нуқсонлари бўлган ҳамда тез-тез (бир йилда 4 марта) дардга чалиниб турадиган болалардан ташкил топган.
- 3-гуруҳ. Сурункали касаллиги бор ёки компенсация даврида патологик ҳолати оғир бўлмаган болаларни бирлаштиради.
- 4-гуруҳ. Сурункали касалликлари бор, субкомпенсация даврида умумий ҳолати бузилган, ўзини ёмон ҳис эта бошлаган, ўткир юқумли касалликлардан сўнг тузалиши кечиккан болалар.
- 5-гуруҳ. Декомпенсация даврида бўлган, оғир сурункали касалликларга чалинган, камҳаракат, таълим муассасаларига қатнай олмайдиган ногирон болалардан иборат.
Эслатиб ўтамиз, Ўзбекистонда 14 сентябрдан бошлаб яна 2300 дан ортиқ мактаб очилиб, уларда анъанавий таълим бошланади. Шундай қилиб, мамлакатда фаолияти йўлга қўйилган мактаблар сони 2635 тани ташкил этади. Аксарият мактабларда анъанавий таълим октябрь ойига қадар тикланиши кутилмоқда. Бунда мактабларни очиш ҳақидаги қарор индивидуал тарзда жойлардаги ҳақиқий ҳолат ҳамда соғлиқни сақлаш тизими хулосаларига мувофиқ, маҳаллий кенгашлар депутатлари рухсатидан сўнг қабул қилинади.
Аввалроқ Соғлиқни сақлаш вазирлигининг ўқув-тарбия муассасалари бўйича бош мутахассиси фарзандларини мактабга юбораётган ота-оналарга бир неча тавсиялар берган эди.
Изоҳ (0)