Фарғона вилоятида 162 та, Самарқанд вилоятида эса 38 та мактабда анъанавий дарслар бошланди. Бу ҳақда «Дарё» мухбирлари хабар берди.
Таъкидланишича, 14 сентябрь куни ҳудудлардаги эпидемиологик вазият, таълим даргоҳи ва соғлиқни сақлаш тизимининг вазиятга тайёрлигидан келиб чиқиб мактабларда анъанавий таълим жараёни бошланган.
Қайд этилишича, Фарғона вилоятида халқ таълими бошқармаси, Санитария-эпидемиология осойишталик марказлари, тиббиёт бирлашмаларининг хулосалари ҳамда Халқ депутатлари туман-шаҳар кенгашларининг тегишли қарорлари билан 162 та таълим муассасасида 2020/2021-ўқув йилини анъанавий тарзда бошлашга рухсат берилган.
Хабар берилишича, Фарғонада аввалроқ мавжуд 937 та мактабнинг 111 тасида карантин талабларига амал қилган ҳолда синов тариқасида илк дарслар бошланган. Шунга кўра, бугунги кунда вилоятда фаолияти йўлга қўйилган мактаблар сони 273 тага етган.
Самарқанд вилоятида ҳам Санитария-эпидемиология осойишталик марказлари, тиббиёт бирлашмаларининг хулосалари, ўқитувчилардан олинган тест натижалари ҳамда Халқ депутатлари туман Кенгашларининг тегишли қарорларига кўра, вилоятнинг 9 та ҳудудидаги 38 та умумтаълим муассасаларида анъанавий тарзда дарслар бошланган. Мазкур таълим даргоҳларида 2003 нафар бошланғич ва юқори синф ўқитувчиси 16849 нафар ўқувчига сабоқ бермоқда.
Маълумот берилишича, Самарқандда 33476 нафар (61,3 фоиз) педагог коронавирусга тест топширган.
Эслатиб ўтамиз, ҳудудларда умумтаълим мактаблари ўз фаолиятини анъанавий тарзда бошлагунга қадар «Онлайн-мактаб» лойиҳаси доирасидаги телевизион дарслар орқали дарс машғулотлари амалга оширилади.
Изоҳ (0)