Lucid Motor стартапи ҳашаматли Lucid Air серияли электромобилини расман тақдим этди. Tesla’нинг асосий рақобатчиси ҳисобланувчи моделни яратишга 10 йилдан ортиқ вақт сарфланган, деб хабар беради The Verge.
Янги модель тўрт версияда тақдим этилади. Air’нинг энг кичик модели техник тавсифи ҳозирча маълум эмас. Таъкидланишича, у 80 минг доллардан 2020 йилда сотувга чиқади.
Air Touring ва Air Grand Touring модификацияларига эса мос равишда 629 ва 811 от кучига эга моторлар ўрнатилади. Биринчи модель бир марта қувватланиш орқали 653 километр, иккинчиси эса 832 километр йўл боса олади.
Чекланган миқдорда ишлаб чиқарилувчи Air dream Edition версияси эса 1095 от кучига эга иккита электромоторга эга бўлади ва у соатига 97 километр тезликка 2,5 сонияда эриша олади. Модель бир марта қувватланиш орқали 809 километр масофа босиши мумкин. Мазкур электромобил нархи 169 минг долларни ташкил этади ва 2021 йилнинг баҳорида сотувга чиқади.
Машинани 34 дюймли эгилган 5К-сифатга эга сурилувчан сенсорли дисплей ёрдамида бошқарса бўлади.
Луcид компанияси Tesla тажрибасидан фойдаланиш ниятида — ҳамёнбоп моделларни ишлаб чиқариш учун кўпроқ қиммат автомобиллар сотиш. АҚШ, Канада, Осиё ва Европанинг айрим мамлакатларида ҳашамали Lucid Air электромобилларига буюртмаларни қабул қилиш бошланган.
Эслатиб ўтамиз, май ойида Хитойнинг BYD автомобиль ишлаб чиқарувчи компанияси ўзининг янги Han EV электрокарини тақдим этган ва у Tesla Model 3’га рақобатчи тайёрлаётганини билдирганди.
Изоҳ (0)