Иорданиянинг АҚШдаги элчихонасига тегишли бўлган ва қирол Абдулла II фойдаланган зирҳли Ford Excursion лимузини катта чегирма билан сотувга қўйилди. 2005 йилда ишлаб чиқарилган ва ҳозирга қадар 6473 километр йўл босган ҳашаматли йўлтанламас 84 минг долларга баҳоланмоқда. Бундан 15 йил олдин у мамлакат ғазнасидаги пулларнинг 620 минг долларига сотиб олинган эди, деб хабар беради Motor.
Ford Excursion — энг улкан серияли енгил машина ҳисобланади, бироқ Иордания қироли йўлтанламасни янада узайтирган. Автомобиль пол қисмидан шифтга қадар зирҳлангани маълум, ён ойналарининг қалинлиги эса 80 миллиметрга етади. Ҳимоя капсуласини яратиш билан Becker Automotive Design ательеси шуғулланган.
Лимузин салони ёрқин сарғиш рангли чарм ва ёғоч билан қопланган; интерьери ажойиб ҳолда сақланган, бироқ алоқа ва DVD-мултимедия тизими эскирган. Мултиконтурли ўриндиқлар ва модадан қолган столлар машинанинг эскилигини ёдга солиб туради.
Йўлтанламас капоти остидан 310 от кучига эга 6,8 литрли В10 бензин двигатели ўрин олган бўлиб, у 4 поғонали автомат узатмалар қутиси ёрдамида бошқарилади. Машина 6,5 минг километр йўл босган, шу сабабли зирҳли автомобиль ишлаб чиқарилганига анча бўлганига қарамай, ажойиб ҳолатда сақланган.
Лимузин 84 минг доллар эвазига сотувга қўйилган. АҚШда яхши қаралган, бироқ кўп йўл босган Excursion йўлтанламасларини (зирҳли бўлмаган) 40 минг долларга харид қилиш мумкин.
Аввалроқ Toyota Land Cruiser 200 ўқ ўтмайдиган лимузинга, янгиланган Инфинити ҚХ80 эса ҳашаматли зирҳли машинага айлантирилгани тўғрисида хабар берилганди.
Изоҳ (0)