ПСЖ ҳужумчиси Неймар Франция чемпионати 3-тури доирасида «Марсель»га қарши кечган баҳсда (0:1) қизил карточка олди.
Ўйин якунланиши арафасида юзага келган тортишув вақтида бразилиялик футболчи меҳмонлар ҳимоячиси Альваро Гонсалеснинг бошига зарба берган ва бунинг натижасида четлатилган.
Неймар майдонни тарк этар экан, захира ҳакамига ҳимоячини кўрсатиб шундай деди: «Ирқчилик, шундай эмасми? Расизмга йўқ! Расист бўлгани учун унга зарба бердим».
Шунингдек, Неймар Гонсалес уни «***** (лаънати) қора танли» деб атаганини ҳам иддао қилмоқда.
Телефоот журналистининг хабар қилишича, Гонсалес бундан ташқари ПСЖ футболчиларидан бирига шундай деган: «Оғзингни ёп, иркит маймун».
Учрашувнинг биринчи бўлимида Гонсалес ва ПСЖ ярим ҳимоячиси Анхель ди Мария ўртасида тортишув келиб чиққанди: испаниялик футболчи ди Мария у томонга тупурганидан шикоят қилганди.
Ўйиндан сўнг «Марсель» бош мураббийи Андре Виллаш-Боаш ҳам ди Мария Гонсалесга тупурганини тасдиқлади.
Эслатиб ўтамиз, учрашув якунланиши арафасида юзага келган жанжалдан сўнг беш нафар ўйинчи четлатиш олди. Улар: Левен Курзава, Леандро Паредес ва Неймар (барчаси ПСЖ), Жордан Амави ҳамда Дарио Бенедетто (иккиси «Марсель»).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)