Ўзбекистон фуқароларини Жанубий Кореяга жўнатиш бўйича фирибгарликка йўл қўйган «Korean and Migrations» хусусий бандлик агентлигининг мансабдор шахсларига нисбатан қўзғатилган жиноят иши бўйича суд жараёни жараёни 14 сентябрь куни ниҳоясига етди ва суд ҳукми эълон қилинди.
Олий суд матбуот хизматининг маълум қилишича, ушбу жиноят иши жиноят ишлари бўйича Яккасарой туман суди судьяси Т. Қосимов томонидан кўриб чиқилди ва судланувчилар — хусусий бандлик агентлиги директори Қаҳрамон Отақулов, агентликнинг Наманган вилоят филиали директори Одил Қобилов, агентлик таъсисчиси Хушвақт Турдиев, агентликнинг ўқув ишлари бўлими директори Мусурмон Алиқулов, агентликнинг Наманган вилоят филиали иш юритувчиси Анваржон Шамшиддинов, агентликнинг Наманган вилоят филиали ғазначиси Орифжон Жўраев, агентлик ҳисобчиси Мавлуда Отажонова, агентликнинг кадрлар бўлими инспектори Раъно Нуралиева, агентлик ҳамкори Канг Нам Кю ва воситачи Жалол Хидиров ҳамда Фурқат Камаловга жазо тайинланди.
Эълон қилинган суд ҳукмига кўра, Қаҳрамон Отақулов Жиноят кодексининг 168-моддаси (фирибгарлик) 4-қисми «а», «в» бандлари, 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми «б» банди ва 3-қисми билан айбдор деб топилди. Унга узил-кесил ўташ учун 3 йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиб, 9 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
Одил Қобилов Жиноят кодексининг 168-моддаси 4-қисми «а», «в» бандлари, 228-моддаси 2-қисми «б» банди ва 3-қисми билан айбдор деб топилди. Унга узил-кесил ўташ учун йил муддатга мансабдорлик ва моддий жавобгарлик лавозимларда ишлаш ҳуқуқидан маҳрум қилиб, 9 йил муддатга озодликдан маҳрум қилиш жазоси тайинланди. Тайинланган жазони қаттиқ тартибли колонияларда ўташ белгиланди.
Хушвақт Турдиев Жиноят кодексининг 168-моддаси 4-қисми «а», «в» бандлари, 228-моддаси 2-қисми «б» банди ва 3-қисми билан айбдор деб топилди. Унга узил-кесил ўташ учун 3 йил муддатга мансабдорлик ва моддий жавобгарлик лавозимларда ишлаш ҳуқуқидан маҳрум қилиб, 8 йил 3 ой муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
Мусурмон Алиқулов Жиноят кодексининг 168-моддаси 4-қисми «а», «в» бандлари, 228-моддаси 2-қисми «б» банди ва 3-қисми билан айбдор деб топилди. Унга узил-кесил ўташ учун 3 йил муддатга мансабдорлик ва моддий жавобгарлик лавозимларда ишлаш ҳуқуқидан маҳрум қилиб, 8 йил 3 ой муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
Эслатиб ўтамиз, «Korean and Migrations» хусусий бандлик агентлиги Ўзбекистон фуқароларини хорижда ишга жойлаштиришга кўмаклашиш билан шуғулланишга лицензия олиб, жамиятга мурожаат қилган фуқароларни 3 ой ичида Жанубий Кореяга ишга юборишни ваъда қилиб, улар билан сохта шартнома тузиб, тўлов квитанцияларини сохталаштирган, жами 2 385 нафар жабрланувчининг 24,8 миллиард сўм пулларини АТБ «Туронбанк» Чилонзор филиалидаги ҳисоб рақамига тўлов қилдириб ҳамда ўзларига нақд кўринишда қабул қилиб, фуқароларнинг жуда кўп миқдордаги пул маблағларини фирибгарлик йўли билан қўлга киритган ҳолда шахсий эҳтиёжларига сарфлаб юборган.
2019 йилнинг октябрь ойида «Korean and Migrations» хусусий бандлик агентлигига берилган лицензия тўхтатилган, март ойида агентлик мансабдор шахсларига нисбатан жиноят иши бўйича дастлабки тергов якунланган, июнь ойида суд жараёни бошланганди.
Изоҳ (0)