Россиялик сиёсатчи Алексей Навальний ўзини яхши ҳис қилмоқда ва қисқа муддатга ўрнидан туриши мумкин. Бу ҳақда сиёсатчи даволанаётган Берлиндаги «Шарите» клиникаси томонидан маълум қилинди, деб ёзмоқда «Интерфакс».
«22 августдан буён «Шарите» университет клиникасида даволанаётган Алексей Навальнийнинг ҳолати яна яхшиланди. Беморни ўпкани сунъий нафас олдириш аппаратидан тўлиқ узишга муваффақ бўлинди. Унинг ҳаракатчанлиги ошмоқда ва қисқа вақтга ётган ўрнидан туриши мумкин», — дейилади клиника томонидан эълон қилинган хабарда.
Германиялик шифокорлар 7 сентябрь куни Навальний сунъий комадан чиқарилгани ва сунъий нафас олдириш аппаратидан босқичма-босқич узилаётганини маълум қилган.
Навальнийнинг аҳволи 20 август куни Томскдан Москвага учаётган пайтда самолётда ёмонлашган. У шошилинч равишда Омскдаги касалхонага ётқизилди ва икки кундан кейин махсус рейс билан Берлинга даволаниш учун олиб кетилди.
Германия ҳукумати лаборатория таҳлили натижаларига асосланиб, Навальний «Новичок» гуруҳига кирувчи асаб тизимини фалаж қилувчи модда билан заҳарланганлигини маълум қилди. Москва, ўз навбатида, рус шифокорлари мухолифатчининг танасида бирон бир заҳар изларини топмаганлигини хабар қилди.
14 сентябрь куни Германия ҳукумати Франция ва Швециядаги махсус лабораториялар мутахассислари Навальнийнинг «Новичок» билан заҳарлангани ҳақидаги хулосани тасдиқлаганини маълум қилди.
Аввалроқ Алексей Навальний заҳарланганидан сўнг тўлиқ ўзига келгани ҳақида хабар берилганди.
Изоҳ (0)