Англия Премьер Лигасининг 1-туридан ўрин олган «Фулҳэм» — «Арсенал» учрашувида (0:3) «Фулҳэм» ҳимоячиси Майкл Ҳектор майдонда ҳаракат қилди. Мазкур ўйин у учун Премьер Лигадаги дебют бўлди.
Ҳектор 2009 йилдан буён 17 та клубда тўп сурган, шулардан 15 таси ижара асосида. «Фулҳэм»га қадар ямайкалик футболчи Англиянинг турли олтита лигасида ҳаракат қилган.
«Мен ниҳоят Премьер Лигада дебют қилдим ва бундан чексиз ғурурдаман. Бу жамоа билан кутган ўйинимиз эмас эди, лекин мен бундан яхшироқ ўйнашимизга ваъда бераман», — деб ёзади Ҳектор Twitter’даги саҳифасида.
«Фулҳэм» бир йиллик танаффусдан сўнг яна юқори дивизионга қайтди. Жамоа кейинги ўйинини яна бир собиқ Чемпионшип вакили «Лидс»га қарши ўтказади.
Маълумот учун, Ҳектор 1992 йил 19 июлда туғилган. Майкл қуйидаги клубларда ижара асосида ҳаракат қилган: «Бракнелл Таун», «Дидкот Таун», «Ҳавант ва Уотерлувилл», «Оксфорд Сити», «Ҳоршем», «Дандолк», «Барнет», «Шрусбери Таун», «Олдершот Таун», «Челтенҳнем Таун», «Абердин», «Рединг» , «Айнтрахт Ф», «Ҳалл Сити», «Шеффилд Уэндсдей».
Футболчининг трансфер ҳуқуқи 2009—2015 йилларда «Рединг» клубига, 2015—2019 йилларда эса «Челси»га тегишли бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)