Нурмат Отабеков: Касал бўлиб қолган кунимни ўзида мен танимаган 802 нафар одам қўнғироқ қилиб, ҳолимдан хабар олди

Республика махсус комиссияси ва Коронавирусга қарши кураш штаби аъзоси Нурмат Отабеков коронавирусдан даволаниш пайтида минглаб одамлар ундан хабар олиб тургани ҳақида «Шифобахшуз» Telegram каналига берган интервьюсида айтиб ўтди.

«Касал бўлиб қолганим ҳақида оммавий ахборот воситаларида хабар тарқалганидан кейин биринчи куннинг ўзида мен танимаган ва билмаган 802 нафар одам қўнғироқ қилиб, ҳолимдан хабар олди. Булар орасида ёши улуғ отахон-онахонлардан тортиб, фуқаролар йиғинлари раислари, шифокорлар, ўқитувчилар, журналистлар, шоирлар, ёзувчилар, оддий фуқаролар бор эди. Улар ўзларининг кимлигини менга таништириб, касалликдан тезроқ фориғ бўлишимни, соғайиб кетишимни хоҳлаётганликларини, дуода эканликларини қайта-қайта таъкидлашди. Кўпчиликнинг саломатлигимга бефарқ эмаслиги мени жуда қувонтирди. Демак мен, тўрт ой давомида халқ билан мулоқот қилиш орқали уларга таниш бўлиб қолибман, хонадонига «кириб борибман» деган фикрга келдим, – деди Ўзбекистон бош давлат санитария инспектори.

Суҳбат чоғида профессор шу даражада кўп қўнғироқ бўлганидан баъзан телефон қўнғироқларига жавоб беришга улгура олмаганини таъкидлаб ўтди.

«Бу даражадаги эътироф ва самимийликни кўриб, менда, шу пайтга қадар бекорга ҳаракат қилмабман, халқимнинг кўнглига йўл топа билибман, уларга таниш чеҳрага айланиб қолибман деган мағрурлик ва эркаланиш ҳисси пайдо бўлди. Ушбу ҳолатни, аниқроқ айтсам, одамларнинг дил изҳорларини, ниятларини, кўнгилларининг тубидаги гапларини эшитган одамгина ҳис қилиши мумкин. Шу эътибордан ўзимга қанот боғладим, кўп жиҳатдан руҳан қувват олдим, назаримда, уларнинг ҳаммаси менга қувват ва кўмак бўлди, касалликдан тезроқ соғайиб кетишимда ёрдам берганини сездим», – деди Нурмат Отабеков.