ДХХ ўтказган рейдда абитуриентларни ўқишга киритиб қўйишни ваъда қилиб пора олган бир қатор шахслар қўлга олинди

ДХХ ОТМларга кириш имтиҳонлари бўлиб ўтаётган бир вақтда абитуриентларни ўқишга киритиб қўйиш билан боғлиқ коррупция ва фирибгарлик билан боғлиқ бўлган қатор жиноятларга чек қўйди. Бу ҳақда ЎзА хабар бермоқда.

Хусусан, Самарқанд вилояти Пастдарғом туманидаги умумтаълим мактабларидан бирининг математика фани ўқитувчиси юқори лавозимда ишловчи танишлари орқали 4 нафар абитуриентни Самарқанд тиббиёт институтига ўқишга киритиб қўйишни ваъда қилади ва уларнинг ҳар бири учун 12 минг доллардан, жами 48 минг доллар талаб қилади.

ДХХ Самарқанд вилояти бошқармаси ва Бош прокуратура ҳузуридаги Департаментнинг ҳудудий бошқармаси ходимлари томонидан ўтказилган тезкор тадбир давомида мазкур шахс келишилган пулдан 40 минг долларни олган вақтида ашёвий далиллар билан ушланди.

Самарқанд педагогика коллежида ўқитувчи бўлиб ишловчи, 1975 йил Иштихон туманида туғилган шахс эса алдов йўли билан маҳаллий фуқаронинг ишончига кириб, уни Қозоғистон Республикасининг Чимкент шаҳрида жойлашган «Miras» университетига ўқишга киритиб қўйиш учун ундан 5500 доллар олган вақтида ушланган.

Жиззах шаҳридаги оилавий поликлиникалардан бирида болалар шифокори бўлиб ишловчи, 1993 йилда туғилган шахс маҳаллий фуқарони Жиззах давлат педагогика институти «Мактабгача таълим» йўналишининг сиртқи бўлимига ўқишга киришига ёрдам беришини айтиб, эвазига 8 минг доллар олаётган вақтида ДХХ Жиззах вилояти бошқармаси ва Департаментнинг ҳудудий бошқармаси ходимлари томонидан ушланган.

Дастлабки суриштирув давомида у ушбу пул маблағини Тошкент педиатрия тиббиёт институти клиникасида шифокор бўлиб ишловчи, 1988 йил Бухоро вилояти Ромитан туманида туғилган жиноий шеригига бериши лозимлигини маълум қилган.

Шундан сўнг тезкор тадбир Тошкент шаҳрида давом эттирилган ва Тошкент педиатрия тиббиёт институти клиникаси шифокори жиноий шеригидан 8 минг доллар олган вақтида ушланган.

Қўқон давлат педагогика институтининг ёшлар масалалари бўйича масъулларидан бири маҳаллий фуқародан унинг танишини мазкур олий ўқув юртининг «Жисмоний маданият» факультетига ўқишга киритиб қўйишни ваъда қилиб, 3000 доллар олган вақтида ДХХ Фарғона вилояти бошқармаси ва Департаментнинг вилоят бошқармаси ходимлари томонидан ушланган.

Дастлабки суриштирув давомида у ушбу пул маблағини институт факультетларидан бирининг деканига бериши лозимлигини айтган ва тезкор тадбир давом эттирилиб, факультет декани ҳам 3 минг доллар олган пайтида қўлга олинган.

Қайд этилишича, ҳозирда мазкур ҳолатлар юзасидан жиноят ишлари қўзғатилиб, ушбу ишларга алоқадор бўлган бошқа шахсларни аниқлаш бўйича чоралар кўрилмоқда.