Ўзбекистон Қатар пойтахти Доҳа шаҳрида Афғонистон ҳукумати ва «Толибон» ҳаракати ўртасида инклюзив музокаралар бошланганини олқишлайди. Бу ҳақда Ташқи ишлар вазирлигининг расмий баёнотида сўз боради.
«Умид қиламизки, афғонлараро мулоқот ўт очишни барқарор тўхтатишга олиб келади ва натижада мамлакатда мустаҳкам ва узоқ муддатли тинчликни ўрнатиш учун зарур шарт-шароитларни яратади. Ўзбекистон ‘сиёсий жараёнлар фақат афғонлар томонидан ва Афғонистон халқи раҳбарлигида олиб борилиши лозим’ деган асосий тамойилга содиқ қолади.
Ўзбекистон томонларнинг миллий ярашувга эришиш йўлидаги саъй-ҳаракатлари ва интилишларини бундан кейин ҳам қўллаб-қувватлайди ҳамда дўст Афғонистон халқига барқарор ва фаровон давлат барпо этишда ҳар томонлама ёрдам кўрсатишда давом этади», — дейилади ТИВ баёнотида.
Аввалроқ Ўзбекистон—АҚШ—Афғонистон уч томонлама ҳамкорлик механизмининг Сиёсат бўйича қуйи қўмитаси биринчи йиғилиши бўлиб ўтган эди. Унда Ўзбекистон афғонлараро музокараларнинг бирини Самарқандда ўтказишга тайёрлигини билдирган.
Мавзуга доир: Ўзбекистон афғонлараро инклузив музокаралар олиб бориш учун 400 нафар «Толибон» аъзосининг озод қилинишини олқишлади
Изоҳ (0)