Адлия вазирлигида 2020 йилнинг 11 сентябрь куни вазирлик, Коррупцияга қарши кураш агентлиги, БМТ Тараққиёт дастури Коррупцияга қарши кураш глобал лойиҳаси ва CERT International менежмент тизимларини сертификатлаш халқаро ташкилоти вакиллари иштирокида Коррупцияга қарши курашиш мавзусига бағишланган матбуот анжумани ўтказилди. Бу ҳақда «Дарё» мухбири хабар бермоқда.
Тадбирда адлия вазири Русланбек Давлетов тизимда коррупцияга қарши курашиш учун ташланган дастлабки қадам, муаммони ҳал қилишдаги ўзига хос механизм тўғрисида гапирди.
«Коррупцияга қарши курашда ягона ва аниқ механизмга эга тизимни яратмасдан туриб, фақат қуруқ гаплар билан масалани ҳал қилиб бўлмайди. Пора олган ходимга огоҳлантириш бериш, тилхат ёздириб олиш билан иш битмайди. Коррупциянининг келиб чиқиш сабаблари таҳлил қилинмагунича муаммо илдизига етиб боролмаймиз.
Уч йил олдин энг коррупциялашган бўғинимиз нотариуслар эди. Аҳоли норозиликлари жуда кўпайган эди. Буни таҳлил қилиб кўрдик. Тан олиш керак: у ерда бюрократия даражаси юқорилиги, ходимлар ойликлари камлиги, фаолиятнинг шаффоф эмаслиги коррупция ўчоғи пайдо бўлишига олиб келган.
Коррупцияни йўқотиш учун шаффофликни таъминлашга ҳаракат қилдик, бюрократияни камайтириш учун электрон ҳужжат алмашинувига ўтилди, ходимлар ойлигини 2-3 бараварга оширдик, ҳар бир нотариус идорасига қоғоз, ручкасигача таъминлаб бердик. Етарли шароитни яратиб бермасдан туриб шаффофликни, коррупцияга тоқатсизлик ҳиссини шакллантириш имконсиз.
Адлия тизимида кадрларни ишга олишда танлов тизими йўлга қўйилди. Кимни ишга олишни комиссия ҳал қилади. Саволларни беришда билет тизимига ўтилди, комиссия аъзоси олдиндан келишилган саволни бера олмайди, яъни алоҳида алгоритм ишлаб чиқилди. Нотариат тизимида шу ёндашув орқали кадрларни ишга олганимизда уларнинг фаолияти юзасидан биронта шикоят тушмади», — деди Давлетов.
Адлия вазирининг таъкидлашича, Тошкентдан хизмат сафари туфайли вилоятларга борган вазирлик ходимини меҳмон қилиш ҳам коррупцияга йўл очади.
«Ўзбекчилик ҳақида кўп гапирамиз. Аммо буни кўп ҳолатларда танқидий маънода ишлатиб, маданиятимизнинг айрим жиҳатларига, одамлар орасидаги шахсий муносабатларга, ривожланишимизга тўсиқ бўлаётгандек танқидий назар билан қараймиз. Бу бежиз эмас, назаримда. Чунки одамларнинг бир-бирига яқинлиги, шахсий муносабатлар, тўйлардаги борди-келди, туғилган кунлардаги қадриятлар, табриклар... Бу нарсалар шубҳасиз коррупцияга мойилликни оширади.
Масалан, ходимларимиз хизмат сафари билан бирор ҳудудга боришса, Тошкентдан меҳмонлар келишибди, деб дастурхон ёзишади. Дастурхоннинг ҳам ҳар хили бор. Бу ҳам керак бўлса коррупция. Ўзининг қариндошларига, дўст-биродарларига дастурхон ёзсин, вазирлик ходимини меҳмон қилишнинг нима кераги бор? Маданиятимиз, «Бир пиёла чой қўя олмаймизми энди?», деган гап билан ҳам биз қандайдир шаклда коррупцияга йўл очиб беряпмиз.
Кимдир примитив дейиши мумкин, лекин адлия тизимидаги ходимлар хизмат сафари вақтида ўша жойдаги ходимлар билан бир дастурхон атрофида ўтириши тақиқланади, қатъий тақиқланади. Шундай ҳолат юз берса, улар шу куннинг ўзида ишдан ҳайдалади.
Шунингдек, ходим хизмат сафари давомида иш юзасидан қиладиган харажатларини юз фоиз нақдсиз шаклда тўлаши керак. Шундай кичик жиҳатларгача эътибор бериш ва натижада қадриятлар шакллантириш орқали коррупция ҳолатларининг олдини олиш мумкин», — деди у.
Изоҳ (0)