Самарқанддаги «Қорадори—2020» тадбири давомида пастдарғомлик 50 ёшли аёл ҳовлисида гиёҳвандлик ўсимлигини етиштиргани аниқланди. Бу ҳақда Тергов департаменти хабар берди.
Қайд этилишича, 50 ёшли Б.П. исмли аёлнинг ушбу ноқонуний хатти-ҳаракати 2020 йилнинг 6 июль куни ИИБ ходимлари томонидан ўтказилган тадбирда фош этилган. Пастдарғом тумани «Катта найманча» маҳалласида яшовчи аёлнинг ҳовлиси кўздан кечирилганда, у ерда 250 квадрат метр майдонда 29 туп каннабис гиёҳвандлик ўсимликлари экиб, парваришлаб келаётгани аниқланган. Ўсимликлар ўрнатилган тартибда ашёвий далил тариқасида расмийлаштириб олинган.
«Мазкур ҳолат юзасидан Пастдарғом тумани ИИБ ҳузуридаги Тергов бўлими томонидан Жиноят кодексининг 270-моддаси 1-қисми (тақиқланган экинларни етиштириш) билан жиноят иши қўзғатилган.
Суд-кимёвий экспертиза хулосасига кўра, аниқланган гиёҳвандлик ўсимликларининг вазни 24.402 граммни ташкил қилиб, улар марихуана гиёҳвандлик воситаси турига кириши кўрсатилган.
Жиноят иши бўйича аниқланган гиёҳвандлик ўсимликлари миқдоридан келиб чиққан ҳолда Б.П.га нисбатан Жиноят кодексининг 25, 273-моддаси 5-қисми (гиёҳвандлик воситаларини кўп миқдорда қонунга хилоф равишда сотишга суиқасд қилиш) билан қўшимча айб эълон қилиниб, «гаров» эҳтиёт чораси қўлланилган. Жиноят иши айблов хулосаси билан тегишлилиги бўйича судловга юборилган», – дейилади департмент хабарида.
Аввал Андижон вилоят ИИБ ҳамда божхона бошқармаси ходимлари 300 граммдан ортиқ гашиш гиёҳванд моддасини 4 минг долларга сотаётган фуқарони қўлга олгани, Тошкент вилояти Олмалиқ шаҳрида марихуана гиёҳвандлик воситасини қовураётган фуқаролар, шунингдек, Тошкент вилоятидаги Болалар ва ўсмирлар спорт мактаби биносида қарийб 6 килограмм марихуана сақлаган ва иш вақтида уни қовурган қоровул ушлангани ҳақида хабарлар берилган.
Изоҳ (0)