Тошкентнинг Олмазор, Учтепа, Шайхонтоҳур ва Юнусобод туманларида 11 сентябрь куни Инвестиция дастури асосида мукаммал таъмирланган 4 та умумтаълим мактабларининг тантанали очилиш маросими бўлиб ўтди.
Халқ таълими вазирлиги матбуот хизматининг хабар беришича, улар қуйидагилар:
- Олмазор туманидаги 22-сонли умумтаълим мактаби (1060 ўринли)
- Учтепа туманидаги 129-сонли умумтаълим мактаби (960 ўринли)
- Шайхонтоҳур туманидаги 102-сонли умумтаълим мактаби (960 ўринли)
- Юнусобод туманидаги 117-сонли умумтаълим мактаби (720 ўринли)
Қайд этилишича, замон талаблари асосида мукаммал таъмирдан чиққан мазкур мактабларда ўқувчиларнинг сифатли таълим олишлари учун барча қулай шарт-шароитлар яратилган. Мазкур мактаблар янгича қиёфага келтирилиб, фасад қисмидан тортиб, ички, коммунал ва иссиқлик тизимларигача батамом замонавий таъмирлаш ишлари олиб борилган.
Хусусан, ушбу мактабларда ахборот технологиялари хонаси, тўгарак хоналари, кимё, биология, физика лаборатория хоналари, хорижий тилларни ўқитишга мўлжалланган ўқув хоналари, ўғил ва қиз болалар учун технология хоналари, мусиқа хонаси, кутубхоналар қайтадан таъмирланган.
Бундан ташқари, ўқувчиларга қулайлик яратиш мақсадида электрон кутубхона, тиббиёт хонаси, фаоллар зали, шинам ошхона, спорт заллари ҳам янги жиҳозлар билан таъминланган. Мактабларда фан хоналаридан ташқари ўқувчиларнинг турли ҳунарларни ўрганиб чиқишлари учун тўгаракларга мос хоналари ҳам ташкил этилган.
Хабарда айтилишича, шу ҳафта давомида пойтахтдаги 16 та мукаммал таъмирланган умумтаълим мактаблари фойдаланишга топширилди.
Эслатиб ўтамиз, Ўзбекистон бўйлаб 14 сентябрдан онлайн дарслар бошланади. Анъанавий таълим вазиятга қараб тикланади.
Изоҳ (0)