ИИВ расмийси: Ўғрилик ва фирибгарлик билан боғлиқ жиноятларнинг аксариятига жабрланувчиларнинг ўзи сабабчи бўлиб қолмоқда

ИИВ ҳуқуқбузарликлар профилактикаси бош бошқармаси бошлиғи полковник Бахтиёр Бердиалиев «Дарё» мухбири Хонзодабегим Аъзамовага берган интервьюсида сўнги пайтларда содир этилаётган жиноятларда жабрланувчиларнинг ўзлари сабабчи бўлиб қолаётганлиги ҳақида гапирди.

«Биз жиноят содир этилган маҳаллаларни ўрганиб чиққанимизда, аксарият ўғрилик, фирибгарлик жиноятлари содир бўлишига аслида одамларимизнинг ўзлари сабабчи бўлиб қолаётганларини аниқладик.

Масалан, кўп фуқароларимиз чорва молларини қаровсиз қолдиради. Керак бўлса бир ойда ҳам хабар олмайдиганлари бор. Ёки савдо нуқталарининг пультга уланмаслиги, видеокузатувлар ўрнатилмаганлиги, қоронғи кўчаларга вақтида чироқлар ўрнатилмаслиги, уйни бемалол очиқ қўйиб ташлаб кетиш ҳам ўғриликларга сабаб бўлади.Ҳаммада ойига 20–25 минг сўм турадиган пультга улаш имконияти бор. Сигнализация ишлайди ёки видео кузатув қўйиш мумкин. Лекин буларни қилмаймиз, нарсаларимизга эътиборсизлик қиламиз, ўғрилик бўлса тезда ИИБга югурамиз», — деди вазирлик вакили.

Бахтиёр Бердиалиев Фарғона ва Наманган вилоятлари аҳолиси хорижга мева экспорт қилаётганда оғзаки келишувлар туфайли кўпинча алданиб қолаётганини мисол қилиб келтирди.

«Деҳқон ва харидор ўртасида брокер бўлади. У деҳқондан қарзга маҳсулотларни олади, лекин пулига келганда бермайди. Яна ўртада аризабозлик бошланади. Бу борада кўп тарғиботлар қиляпмиз. Имкон борича маҳсулотларингизни фақат нақд пулга беринг ёки олдиндан 10-15 фоизини олиб шартнома қилинглар деймиз. Лекин халқимиз жудаям ишонувчан, одамларимиз содда.

Биласизми, йиллар давомида фуқаролик судида юрганлар бор. Ҳаммаси олди-сотди, уй-жой, қарз бериш, машина сотиш, тадбиркорлик масалалари...Тадбиркор четдан ускуналар олиб келиб беради деб бировга қуруқ келишув билан пулларини беради. Иккинчи одам эса табиийки, алдаб кетади. Кейин ортидан йиллаб пулини ололмай югуриб юради. Биз ҳам уларнинг орасига тушамиз, аммо орада на шартнома, на бирор ҳужжат бор. Исботлаш учун эса йиллар керак бўлади», — деди полковник Бердиалиев.

ИИВ ҲПББ бошлиғи одамларни огоҳ бўлишга ва олди-сотди келишувларини имкон қадар нақд пулда амалга оширишга чақирди.