Қозоғистон Саноат ва инфратузилмаларни ривожлантириш вазирлиги Қозоғистонга учиб келадиган парвозлар бўйича амалдаги чекловларни эълон қилди. Бу ҳақда Ўзбекистон Транспорт вазирлиги хабар берди.
Маълум қилинишича, Қозоғистон бош давлат санитария шифокорининг 2020 йил 15 августдаги 48-сонли қарорига биноан мунтазам халқаро қатновлар учун жорий қилинган бир қатор чеклов чоралари ўз кучида қолмоқда.
Хусусан, биринчи тоифага киритилган Хитой, Жанубий Корея, Япония, Грузия, Таиланд, Венгрия, Ҳиндистон, Германия, Чехия, Малайзия, БАА, Беларусь, Туркия, Миср, Украина, Нидерландия ва Россиядан келган йўловчилар термометриядан ўтади ва сўровнома тўлдиради.
Иккинчи тоифадаги Польша, Ўзбекистон, Тожикистондан келганлар термометрия ва саволномадан ўтади. Шунингдек, ушбу мамлакатлар фуқаролари сўнгги 5 кун ичида топширган ПЗР тести натижалари манфий бўлган тақдирдагина Қозоғистонга чекловсиз кира олади. Маълумотнома бўлмаган тақдирда, фуқаролар келган кундан бошлаб 48 соат ичида лаборатория таҳлилини топширади ёки 14 кун давомида карантинда бўлади.
Айни пайтда Қозоғистонда биринчи ва иккинчи тоифадаги мамлакатлардан ташқари барча мамлакатлар билан мунтазам парвозлар тақиқланган.
Эслатиб ўтамиз, Uzbekistan Airways 4 сентябрдан бошлаб Тошкент ҳамда Дубай, Франкфурт, Олмаота, Бишкек, Истанбул шаҳарлари ўртасида мунтазам халқаро авиапарвозларни тиклашини маълум қилган.
Изоҳ (0)