Ўзбекистон Президенти Шавкат Мирзиёевнинг катта қизи, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева ўғилли бўлди. Болакайга бобосининг шарафига Шавкат исми қўйилди. Бу ҳақда Саида Мирзиёева Telegram’даги каналида маълум қилди.
«Барчамиз учун ҳали-ҳамон қийин бўлса-да, ҳаёт давом этмоқда. Одамлар тўйларда хурсандчилик қилмоқда, болалар дунёга келмоқда. Биз ҳам кўпайишдик — жажжи Шавкатжон, бизнинг қуёшимиз. Биз у билан яқинда танишдик, лекин биринчи учрашувимиздаёқ ўртада шунчалар кучли муҳаббат пайдо бўлдики, биз кунига 24 соат бирга бўламиз. Оналар бунинг нима эканини билишади», — деб ёзди Саида Мирзиёева.
Эслатиб ўтамиз, Саида Мирзиёеванинг катта ўғли Миромон 28 март куни 15 ёшга тўлганди. Шунингдек, Саида Мирзиёеванинг Саодат исмли қизи ҳам бор.
Маълумот учун, Шавкат Мирзиёевнинг кенжа куёви Отабек Умаров Президент оиласининг ижтимоий тармоқлардаги энг фаол вакили бўлиб, 4 декабрь куни Instagram’даги саҳифасида қайнонаси Зироатхон Мирзиёевани, божаси Ойбек Турсуновни 24 ноябрь куни таваллуд куни билан табриклаган эди (тўнғич куёв неча ёшга тўлгани маълум эмас). Аввалроқ 4 ноябрь куни Отабек Умаров божасининг рафиқаси Саида Мирзиёевани, 1 августда ўз онасини, 8 август куни ўз рафиқаси Шаҳноза Мирзиёевани, таваллуд кунлари билан қутлаган эди. 28 октябрда эса оила қурганликларига 12 йил тўлгани муносабати билан Отабек Умаров ва Шаҳноза Мирзиёева бир-бирларини табриклашган эди (Отабек Умаров 25 январь куни ўртанча қизи Меҳрихонни 10 ёшга тўлгани муносабати билан, 17 сентябрда тўнғич қизи Маърифатхонни 11 ёшга тўлгани билан, 29 октябрда эса кенжа қизи Ранияни ҳам туғилган билан куни табриклаган).
Изоҳ (0)