Тожикистон пойтахти Душанбе шаҳрида 1992 йилдан буён президент саройи вазифасини бажарган мамлакат Коммунистик партияси марказий кенгашининг собиқ биносини бузиш ишлари давом этмоқда. Бу ҳақда Asia Plus хабар берди.
Мажмуа марказида жойлашган саройнинг асосий биноси ва ўнг қаноти бузиб бўлинган. Бу жойда Тожикистон ҳукуматининг янги биносини қуриш режалаштирилмоқда.
Тожикистон пойтахтида жойлашган мазкур бино 1957 йилда қурилган. Совет Иттифоқи даврида бинода Тожикистон ССР компартиясининг марказий кенгаши жойлашган.
Мамлакат мустақилликка эришганидан сўнг мазкур бинода 25 йил давомида президент аппарати ва ҳукумат фаолият олиб борган. 2016 йилда эса президент аппарати ва ҳукумат янги бинога кўчиб ўтган. Ҳозирги пайтда бу бинода Душанбе шаҳри мэрияси жойлашган. Мэрия мазкур бинога уч йил аввал Туризм қўмитаси билан бирга кўчиб ўтган эди.
Президентнинг собиқ саройи бузилиши пойтахтнинг бош режаси доирасида амалга оширилмоқда. Собиқ саройни бузиш ишлари бошлангани ҳақида 2020 йилнинг июль ойида хабар берилганди.
Изоҳ (0)