Сенатнинг еттинчи ялпи мажлисида «Ногиронлиги бўлган шахсларнинг ҳуқуқлари тўғрисида»ги қонун сенаторлар томонидан муҳокама қилиниб, маъқулланди. Унда Сенат раиси Танзила Норбоева ногиронлиги бор бўлган шахслар муаммолари юзасидан амалга оширилиши зарур бўлган жиҳатларга урғу берди.
«Ногиронлиги бўлган шахсларнинг ҳуқуқлари тўғрисида»ги қонун ҳақиқатан ҳам ўта муҳимдир. Мазкур йўналишда йиллар давомида талай муаммолар тўпланиб қолганини ҳаммамиз яхши биламиз. Шу жумладан, ногиронлиги кундек равшан бўлган инсонларни ҳар сафар қайта-қайта кўрикдан ўтказиш, текшириш амалиёти ҳам йўқ эмас. Қонунда бундай ҳолатларга йўл қўймаслик, ногиронликни белгилаш жараёнини соддалаштириш бўйича аниқ нормалар белгиланганини ҳам эътироф этишимиз керак», — дейди Танзила Норбоева.
Сенат раиси ногиронлиги бўлган шахслар билан ишлашда статистикани тартибга солиш керак эканини ҳам таъкидлаган. Унинг айтишича, ногиронлик масаласини таҳлил қилиш, ногиронлиги бор шахсларни ҳар томонлама қўллаб-қувватлаш, уларни ижтимоий ҳаётга тўлиқ интеграция қилиш учун бундай шахслар, уларнинг сони, истиқомат қилаётган ҳудудлар, ногиронлик даражаси ҳамда шу каби муҳим жиҳатлар тўғрисида аниқ маълумотга ва тасаввурга эга бўлиш шарт. Акс ҳолда, амалга ошириладиган ишлар тўлиқ бўлмайди, қайсидир қатлам, қайсидир инсонлар эътибордан четда қолиб кетаверади.
«Бундан ташқари, халқаро мезонлардан келиб чиқиб, мамлакатда ногиронлиги бор шахслар учун ‘тўсиқсиз муҳитъни шакллантиришимиз лозим. Бу борада муаммоларимиз етарлича. Кундалик ҳаётимизда – транспорт, овқатланиш шоҳобчалари, хизмат кўрсатиш объектлари, маданий-кўнгилочар масканларда ногиронлиги бор шахслар учун зарур шароитлар яратилмаганига кўп дуч келамиз. Табиийки, бу уларнинг ҳақли эътирозларига сабаб бўлмоқда», — дейди Сенат раиси.
Шунингдек, ногиронлиги бор шахсларни ижтимоий ҳаётга интеграция қилишга устувор аҳамият қаратиш кераклиги, улар ўзларини жамиятнинг тўлақонли аъзоси эканликларини доимо ҳис қилишлари лозимлиги таъкидлади.
Изоҳ (0)