Чироқчи туман ИИБ биносида вафот этган 32 ёшли Юсуф Абдураҳмонов ўлимидан олдин ИИБ ходимлари томонидан аёвсиз калтакланган. Бу ҳақда суд мажлисида гапириб берган марҳумнинг яқинлари — Шодмон ҳамда Маҳмариза Абдураҳмоновларнинг маълум қилишича, марҳумнинг синмаган суяги қолмаган.
«Ўликни ювдик, ғичирлаган суяк. Синмаган жойи қолмаган. Ҳатто эшакни ҳам бунчалик уришмайди. Буларни ҳам инсон туққан-ку, ахир», — дейди марҳумнинг укаси Шодмон Абдураҳмонов.
Судда сўз олган навбатдаги гувоҳ, марҳум Юсуф Абдураҳмоновнинг акаси Маҳмариза Абдураҳмоновнинг айтишича, 2020 йил 23 январь куни укаси яшайдиган Лангар қишлоғига кетаётган пайтда йўлда марҳумни олиб келаётган ИИБ ходимларига дуч келган. Марҳумнинг уйини билмаяпмиз, дея йўлда тўхтаб турган ИИБ ходимларига йўл кўрсатиб, жасадни отасининг хонадонига олиб борган.
«Жасадни ташлаб кетишгач, эртаси куни ювамиз деб кўздан кечирдик. Ўнгга оламан десам, ғирт этиб бир ниманинг товуши чиқади. Бу ёққа оламан десам, ҳам суякнинг товуши чиқади. Демак, бу болани эзиб ташлашибди-да деган хаёлга бордим», — дейди Маҳмариза Абдураҳмонов.
Марҳум Юсуф Абдураҳмонов ўлими бўйича 2020 йил 8 сентябрь куни бошланган суд ишини Олий суд судьяси К.Толлибоев раислигида судьялар Э.Эргашев ва Р.Орзиқуловдан иборат суд таркиби кўриб чиқмоқда.
Эслатиб ўтамиз, аввалроқ мазкур иш бўйича гувоҳлик берган ИИБ ходимларининг гапи бир-бирига қовушмаётгани ҳамда ИИБ ходими фуқаро Баҳром Авлиёқуловга уни ва Юсуф Абдураҳмоновни ўлдириб юборишини, ишни эса бир парча қоғоз билан ёпиши мумкинлигини айтгани ҳақида хабар берилганди.
Мавзуга доир:
- «Чироқчи воқеаси» бўйича судда гувоҳликка чақирилган ИИБ ходими ота-бола қийноққа солинган куни «противогаз» сўраб олинганини тан олди
- Чироқчи ИИБдаги фуқаронинг уриб ўлдирилиши ишида яна 13 нафар ходимнинг қўли борлиги маълум қилинди
- «Чироқчи воқеаси» ортидан вилоят ИИБ бошлиғи ўринбосари ишдан кетди
Изоҳ (0)