Молия вазирлиги Ўзбекистоннинг давлат ташқи қарзи 2020 йилнинг биринчи ярмида қанчага ошганини маълум қилди

Молия вазирлиги Ўзбекистоннинг 2020 йил биринчи ярим йиллиги бўйича давлат қарзи ҳолати ва динамикаси шарҳини эълон қилди.

2020 йил 1 июль ҳолатига Ўзбекистон Республикаси номидан ва унинг кафолати остида жалб қилинган қарз қолдиғи дастлабки ҳисоб-китобларга кўра 19,4 миллиард АҚШ доллари эквивалентини ёки ялпи ички маҳсулотга (ЯИМ) нисбатан 34,0 фоизни ташкил этган.

Дастлабки ҳисоб-китобларга кўра, 2020 йилнинг I ярим йиллигида давлат ташқи қарзи 1,6 миллиард долларга ёки йил бошига нисбатан 10,5 фоизга ошиб, 2020 йилнинг 1 июль ҳолатига 17,31 миллиард доллар ёки ЯИМга нисбатан 30,3 фоизга етди.

Шундан:

• Ҳукумат номидан жалб қилинган ташқи қарз – 11,6 миллиард доллар;
• Ҳукумат кафолатлаган ташқи қарз – 5,7 миллиард доллар.

• Ҳукумат номидан жалб қилинган ички қарз – 4,3 триллион сўм (0,4 миллиард доллар);
• Ҳукумат кафолатлаган ички қарз – 17,3 триллион сўм (1,7 миллиард доллар).

Шарҳда қайд этилишича, давлат қарзининг сўнги йиллардаги ўсиши динамикасига қарамай, халқаро меъёрларга кўра, Ўзбекистоннинг давлат қарзи (ЯИМга нисбатан - 34,0 фоиз), шу жумладан, давлат ташқи қарзи (ЯИМга нисбатан - 30,3 фоиз) мўътадил даражада сақланиб қолмоқда.

Ўзбекистоннинг давлат ташқи қарзи портфели валюта таркибининг 69,4 фоизи - доллар, 11,9 фоизи - япон иенаси, 10,7 фоизи – СДР (махсус қарз олиш ҳуқуқлари), 4,5 фоизи – евро, 3,5 фоизи - бошқа валюталардаги ташқи қарз ҳиссасига тўғри келади.

Давлат ташқи қарзининг кредиторлар кесимида тақсимланиши қуйидагича:

• Осиё тараққиёт банки – 3,9 миллиард доллар;
• Жаҳон банки – 3 миллиард доллар;
• Хитой эксимбанки – 2 миллиард доллар;
• Япония халқаро ҳамкорлик агентлиги – 1,7 миллиард доллар;
• Хитой давлат тараққиёт банки - 1,3 млрд доллар;
• Халқаро инвесторлар – 1 миллиард доллар;
• Ислом тараққиёт банки – 0,8 миллиард доллар;
• Япония халқаро ҳамкорлик банки – 0,4 миллиард доллар;
• Бошқа халқаро молиявий ташкилотлар – 3,2 миллиард доллар.