Қашқадарё вилояти Қарши шаҳрида автомобилини жарима майдончасидан чиқариб бериш эвазига ЙПХ ходимига пора таклиф қилган фуқаро қўлга олинди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.
Маълум қилинишича. 2020 йилнинг 8 сентябрь куни Қашқадарё вилояти ИИБ ЙҲХБ ЙПХ инспектори Б.Омонтурдиев соат 11:50 да Қарши шаҳар Насаф кўчасида жойлашган Artel савдо дўкони ёнида хизмат олиб бораётган вақтда ушбу кўчада ҳаракатланиб келаётган Nexia машинасини тўхтатган. Ҳайдовчи Д.А.нинг ушбу транспорт воситасини бошқариш ҳуқуқини берувчи меъёрий ҳужжатлари бўлмаганлиги сабабли унга нисбатан маъмурий баённома расмийлаштирилган ва автомашина вақтинча сақлаш учун жарима майдончасига жойлаштирилган.
Шундан сўнг ҳайдовчи вилоят ИИБ ЙҲХБ ЙПХБ махсус отряд командирининг ўринбосари Ж.Шамсиддиновнинг хизмат хонасига бориб, автомашинани жарима майдончасидан чиқариб бериш эвазига бир миллион сўм миқдорида пора таклиф қилган. Ж.Шамсиддинов мазкур ҳолат юзасидан билдирги орқали вилоят ИИБ бошлиғи номига мурожаат қилган.
Билдирги асосида ҳуқуқни муҳофаза қилувчи орган ходимлари томонидан 9 сентябрь куни ўтказилган тезкор тадбир давомида фуқаро Д.А. ЙПХ ходими Ж.Шамсиддиновга автомашинасини жарима майдончасидан чиқариб бериш эвазига бир миллион сўм миқдоридаги пулларни пора тариқасида бераётган вақтда ашёвий далиллар билан ушланган.
Мазкур ҳолат юзасидан Бош прокуратура ҳузуридаги Иқтисодий жиноятларга қарши курашиш департаменти Қарши шаҳар бўлими томонидан 9 сентябрь куни Ўзбекистон Республикаси Жиноят кодексининг 211-моддаси 1-қисми (пора бериш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)