Арманистон ҳукумати бутун мамлакат ҳудудида 11 сентябрдан 2021 йилнинг 11 январигача карантин эълон қилди. Бу ҳақда «Интерфакс» хабар берди.
Мамлакат ҳукумати томонидан маълум қилинишича, карантин Жаҳон соғлиқни сақлаш ташкилоти томонидан эълон қилинган коронавирус пандемияси, бутун дунёдаги қалтис вазият, касалликнинг Арманистонда кенг миқёсда тарқалгани, ЖССТнинг иккинчи тўлқин ҳақидаги огоҳлантириши, аҳолини ҳимоя қилиш зарурати сабабли жорий қилинмоқда.
Ҳукумат қарорига кўра, Арманистон фуқароси бўлмаган шахсларнинг мамлакат ҳудудида қуруқлик орқали кириши тақиқланади. Дипломатлар, вафот этганларнинг яқин қариндошлари, халқаро юк ташиш билан шуғулланувчилар бундан мустасно. Мамлакатга кириб келадиган барча шахслар тиббий кўрикдан ўтиши шарт.
Жамоат ва оммавий тадбирларни 60 кишидан кўп бўлмаган иштирокчи билан ўтказишга рухсат берилади. Савдо ташкилотлари, ўқув муассасаларининг фаолияти назорат органи томонидан эпидемияга қарши чоралар асосида тартибга солинади. Оммавий йиғилишлар ва митингларни ўтказишга шахсий ҳимоя ва иштирокчилар ўртасида 1,5 метр ижтимоий масофани сақлаш шарти билан рухсат берилади. Арманистоннинг барча фуқаролари ўзи билан шахсни тасдиқловчи ҳужжат олиб юриши керак.
Арманистонда 11 сентябрь куни 16 мартдан буён эълон қилинган ва беш марта узайтирилган фавқулодда ҳолат режими якунига етди.
Мамлакат парламенти 4 сентябрь куни навбатдан ташқари йиғилишида карантин режимини эълон қилиш эҳтимолини назарда тутувчи қонунларга ўзгартиришлар киритди.
Арманистон бош вазири Никол Пашинян 10 сентябрь куни мамлакатда пандемия билан боғлиқ вазият босқичма-босқич барқарорлашаётгани, бироқ умумтаълим мактаблари очилиши муносабати билан вазиятнинг ёмонлашиш хавфи сақланиб қолаётганини маълум қилган.
Арманистонда ўтган бир суткада 177 кишида коронавирус аниқланган, мамлакатда касаллиги тасдиқланганларнинг умумий сони 45 503 кишига етган. Касаллик оқибатида қурбон бўлганлар сони эса 1189 кишини ташкил қилмоқда. 41 434 киши касалликдан тузалган.
Изоҳ (0)