10 сентябрь куни Сирдарё вилояти ҳокимлигида вилоят ҳокими Ғофуржон Мирзаев раислигида фаоллар йиғилиши бўлиб ўтди. Ҳокимлик матбуот хизматининг ёзишича, йиғилишда вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимига янги тайинлов амалга оширилган.
Шу кунга қадар Ширин шаҳар ҳокими лавозимида ишлаб келган Абдуғаффор Ҳожиматов вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари этиб тайинланган.
Маълумот учун, Абдуғаффор Ҳожиматов 1967 йилда Наманган вилояти Уйчи туманида туғилган. 1994 йилда Наманган муҳандислик-технология институтини тамомлаган.
Меҳнат фаолияти давомида Наманган муҳандислик-технология институти муҳандиси, Сирдарё вилояти «Сирдарё газ таъминоти» бошқармаси етакчи муҳандиси, Сирдарё вилояти «Гулистон газ таминоти» корхонаси бош муҳандиси, Вазирлар Маҳкамаси ҳузуридаги «Ўзнефтгазинспекцияси» Сирдарё вилояти бўлими 1-тоифали муҳандис-технологи, етакчи муҳандис-технологи, бош технологи, «Марказгазтаъминот» унитар корхонаси Сирдарё вилояти газ таъминоти бошқармаси бошлиғи, Сирдарё вилояти ҳокимлиги саноатни ривожлантириш, капитал қурилиш, коммуникациялар ва коммунал хўжалик масалалари котибияти мудири лавозимида фаолият юритган.
Аввалроқ Абдуғаффор Ҳожиматов бошқа лавозимга тайинлангани муносабати билан Ширин шаҳар ҳокими вазифасидан озод қилингани, унинг ўрнига шу кунгача «Юксалиш» умуммиллий ҳаракатининг Сирдарё вилояти ҳудудий бўлинмаси раҳбари лавозимида ишлаб келган Сарварбек Султонов ҳоким этиб тасдиқлангани тўғрисида хабар берилганди.
Мавзга доир: Самарқанд вилояти ҳокимига янги ўринбосар тайинланди
Изоҳ (0)