Чирчиқ шаҳрида жойлашган Тошкент вилояти юқумли касалликлари шифохонаси бош шифокори, Тошкент вилояти бош инфекционисти Гулжаҳон Йўлдошева 8 сентябрь куни ҳибсга олинган. Бу ҳақда BBC News O‘zbek хабар берди.
Гулжаҳон Йўлдошеванинг синглиси Шаҳло Йўлдошева билан боғланган «Kun.uz»нинг маълум қилишича, у бу маълумотни тасдиқлаган, аммо айни вақтда Гулжаҳон Йўлдошевага қандай айблов қўйилганини билмаслигини, опаси коронавирусга чалиниб даволанганини, ҳибсга олинишидан бир кун олдин шифохонадан чиққанини, соғлиги ҳали тўлиқ тикланмаганини, ҳибсга олиниши натижасида икки ва уч ёшли фарзандлари онасидан ажратилганини айтиб берган.
Аввалроқ Гулжаҳон Йўлдошева пандемия шароитида у бошчилик қилган касалхонага керакли тиббий ускуналар ажратилмаётгани ва раҳбарлиги остида коронавирус беморларини ўзи ва оиласи ҳаётини хавф остига қўйиб даволаган тиббиёт ходимларининг меҳнати муносиб рағбатлантирилмаётганини, оғир вазиятда Тошкент вилояти тиббиёт бошқармаси томонидан керакли ёрдам берилмаганини айтганди.
Мавзуга доир: «Бизга ускуналар ажратишмаяпти, ваъда қилинган мукофот пулларидан дарак йўқ» — Тошкент вилоятининг бош инфекционисти мурожаати
Кейинроқ, бу масалада вилоят соғлиқни сақлаш бошқармаси бошлиғи Тўрақул Арзиқулов муносабат билдириб, Чирчиқдаги шифохона COVID-19’ни даволашга ихтисослашмаганини, Гулжаҳон Йўлдошева асоссиз маълумотлар тарқатаётганини айтган. Бироқ мазкур касалхона COVID-19’га чалингланларни даволагани ва оғир пандемик вазиятда керакли тиббий техника билан таъминланмагани борасида айтилган иддаоларга етарлича изоҳ бермаганди.
«Kun.uz» Гулжаҳон Йўлдошеванинг ҳибсга олиниши билан боғлиқ вазият юзасидан изоҳ олиш мақсадида Бош прокуратуранинг жамоатчилик билан алоқалар ва ҳуқуқий ахборот бўлимига мурожаат қилганда бўлим бошлиғи Ҳаёт Шамсутдинов ушбу масала юзасидан қисқа фурсатларда ахборот берилишини билдирган.
Маълумотларга кўра, Гулжаҳон Йўлдошева 2018 йил сентябрдан буён Тошкент вилояти юқумли касалликлари шифохонаси бош шифокори, Тошкент вилояти бош инфекционисти лавозимида ишлаб келади. 6 нафар фарзанднинг онаси, фарзандларининг кичиги 2020 йилнинг 20 сентябрида икки ёшга тўлади.
Изоҳ (0)