Самарқанд вилояти ҳокимлигида вилоят ҳокими Эркинжон Турдимов ва Украинанинг Ўзбекистондаги элчиси Николай Дорошенко ўртасида ўзаро мулоқот ташкил этилди. Бу ҳақда «Дарё»га вилоят ҳокимлиги ахборот хизмати маълум қилди.
Учрашувда Ўзбекистон ва Украина алоқаларининг мустаҳкамланиб бораётгани, икки мамлакат минтақалари ўртасидаги савдо-иқтисодий, инвестициявий ҳамкорликнинг ривожланишига хизмат қилаётгани таъкидланган. Мавжуд имкониятлардан самарали фойдаланган ҳолда вилоятда IT Park ташкил этиш, соғлиқни сақлаш, қишлоқ хўжалиги маҳсулотларини қайта ишлаш, чорвачилик ва бошқа бир қатор соҳалар бўйича биргаликда амалга оширилиши мумкин бўлган лойиҳалар муҳокама қилинган.
Учрашувда элчи Самарқанд билан дўстона алоқа ўрнатган Львов вилояти раҳбари Максим Козицкийнинг вилоят вакилларини Львовга таклиф этган таклифномасини топширган.
Қолаверса, Самарқанд ва Львов шаҳарлари ўртасида тўғридан-тўғри авиақатновларни йўлга қўйиш масаласи ҳам муҳокама қилинган.
Қўшимча қилинишича, тез фурсатда украиналик ишлаб чиқарувчилар ва самарқандлик ишбилармонлар ўртасида онлайн учрашув ташкил этилиб, ўзаро ҳамкорлик кенгайтирилади.
Изоҳ (0)