Ўзбекистон бош вазир Абдулла Арипов бошчилигидаги делегация ўзбек-тожик муносабатларининг бир қатор масалаларини муҳокама қилиш учун Душанбега боради. Бу ҳақда Asia-Plus хабар қилди.
Маълум қилинишича, Тожикистон ва Ўзбекистон савдо-иқтисодий ва ижтимоий-маданий ҳамкорлик бўйича ҳукуматлараро қўшма комиссиясининг навбатдаги йиғилиши 28–29 сентябрь кунлари Душанбеда бўлиб ўтиши режалаштирилган.
Абдулла Арипов ва Тожикистон бош вазири Қоҳир Расулзода икки давлат ўртасида март ойининг ўрталарида коронавирус инфекцияси тарқалиши сабабли ёпилган чегараларни очиш ва парвозларни тиклаш бўйича масалаларни муҳокама қилиши кўзда тутилган.
Учрашувда томонлар ўзаро савдо-сотиқни ривожлантириш, истиқболли инвестиция лойиҳалари, транспорт ва коммуникация соҳасидаги алоқаларни кенгайтириш, минтақалар ўртасидаги муносабатларни муҳокама қилиш ниятида.
Қайд этилишича, йиғилишда Тожикистондан Ўзбекистонга электр энергияси етказиб бериш ҳажми, Ўзбекистондан Тожикистонга табиий газ етказиб бериш ҳажми ва уларнинг келгуси йилги нархлари тўғрисида ҳам келишиб олинади.
Маълум қилинишича, ўтган йили Ўзбекистон 1 миллиард 425,1 миллион киловатт / соат тожик электр энергиясини ҳар бир киловатт учун 2 сент нархида олган. Тожикистондан Ўзбекистонга электр энергияси экспортининг умумий ҳажми 28,5 миллион долларни ташкил этган.
Шунингдек, 2019 йилда Тожикистон Ўзбекистондан 140 миллион кубометр табиий газни 17,7 миллион долларга сотиб олган.
Изоҳ (0)