Қариликни инкор қилиб бўлмайди, лекин уни кечиктириш мумкин. Бунинг учун саломатликка эътиборли бўлиш, тўғри турмуш тарзига амал қилиш керак бўлади. «Домашний очаг» журнали ёшликни узоқ вақт сақлашга ёрдам берадиган одатлар қайсилигига тўхталди.
Пиёда юриш
Кунига 40 дақиқа пиёда юрган одамда хотира билан боғлиқ ҳеч қандай муаммо кузатилмайди. Иллинойс университети олими Артур Краммэрнинг ўтказган тадқиқотида мунтазам пиёда юрадиганлар миясининг хотира учун жавоб берадиган қисми анча яхши бўлиши аниқланган. Шунингдек, фазовий хотираси ҳамда нейронларнинг ташкил топишида аҳамиятли бўлган оқсил тури ҳам яхшироқ ишлаб чиқарилиши маълум бўлган.
Йога
Огойо университети мутахассислари ўтказган тадқиқотда йога билан шуғулланадиган аёллар қонида қаришдан дарак берувчи маркерлардан бири ҳисобланган цикотин кам миқдорда бўлиши аниқланган. Бундан ташқари ушбу шарқ гимнастикаси қандли диабет, юрак қон-томир касалликларига чалиниш хавфини ҳам камайтиради.
Қуёшда тобланинг
Қуёш нуридан 10-15 дақиқа баҳра олинганда организм керакли миқдорда D витамин билан тўйинади. Лондоннинг Қироллик коллежи профессорларининг таъкидлашига қараганда, организмида D витамини кўп бўлганлар «қуёш витамини» етишмайдиган тенгдошларига нисбатан 5 ёшга ёшроқ кўринади.
Дипломга эга бўлиш
Дипломни ёш кўринишга нима алоқаси бор, деб ўйлаганларга Лондон университети олимларининг чиқарган хулосалари жавоб бўла олади. 400 нафар кекса ёшли иштирокчи билан ўтказилган тадқиқотда университетни тамомлаган инсонлар нисбатан секин қариши аниқланган. Аммо олимлар бунинг сабаби нима билан боғлиқ эканини ҳали аниқлашганича йўқ.
Изоҳ (0)