Мактабгача таълим ташкилотларига тоза сув захираси, тозаловчи ва дезинфекция воситалари мавжудлигини таъминлаган ҳолдагина иш бошлашига рухсат берилади. МТТлар очилиши учун халқ депутатлари Кенгаши ва санитария-эпидемиологик осойишталик ва жамоат саломатлиги хизматининг рухсати талаб қилинади. Бу ҳақда 2020 йил 10 сентябрь куни Мактабгача таълим вазирлигида вазир Агриппина Шин хабар қилди.

Фото: «Дарё»

«Мактабгача таълим вазирлиги 7 сентябрдан 14 сентябргача Тошкент ва Тошкент вилоятининг туманларида биттадан МТТнинг очилишини йўлга қўйди. МТТларининг фаолиятини фақатгина халқ депутатлари Кенгаши ҳамда санитария-эпидемиологик осойишталик ва жамоат саломатлиги хизматининг рухсати билан муайян МТТга қатновчи боланинг ота-онаси розилиги билан амалга оширилади.

14 сентябрдан бошлаб ушбу жараён бутун республика бўйлаб босқичма-босқич ўтказилади.

Биринчи ўринда, катта ва 5-7 ёшли тарбияланувчилар тайёрлов гуруҳлари очилади. Ўрта гуруҳларнинг (4-5 ёшдаги болалар) очилиши октябрь ойига, кичик гуруҳларнинг (3 ёшдаги болалар) очилиши ноябрь ойига мўлжалланган. Очилиш муддатлари мамлакатдаги эпидемиологик вазиятга қараб ўзгариши мумкин. Бундан ташқари, Жаҳон банки кўмагида 14 мингта инфрақизил контактсиз термометрлар сотиб олинди. Мосламаларнинг вилоятларга етказиб берилиши ва тарқатилиши сентябрь ойининг иккинчи ярмида амалга оширилиши режалаштирилган», – деди Мактабгача таълим вазири Агриппина Шин.

Фото: «Дарё»

Хусусан, МТМларнинг очилишида тарбияланувчилар ва ходимлар хавфсизлигини таъминлаш учун қуйидаги чора-тадбирлар кўрилади:

  • Кириш жойида тўпланишларни олдини олиш учун тарбияланувчилар тасдиқланган жадвал асосида кузатиб қўйилади ва олиб кетилади. Уларни тарбиячилар қабул қилиб олади, бола тарафидан бўлган вакиллар МТТ ҳудудига киритилмайди;
  • Очиқ ҳаводаги машғулотлар ва сайрлар пайтида болалар, тарбиячилар ва уларнинг ёрдамчиларининг бевосита муносабатига йўл қўйилмайди;
  • Биноларда кунига 3 маротаба тозаловчи воситалар ёрдамида сувли ва 1 маротаба дезинфекция воситалари орқали тозалаш ишлари, бундан ташқари, кўп муомалага киришувчи юзаларнинг 4 карра дезинфекцияси амалга оширилади.

Туман ҳокимиятлари маҳаллий бюджет ҳисобидан:

  • Сув таъминоти тизимига уланмаган ва артезиан қудуқларига эга бўлмаган давлат МТТга узлуксиз сув захирасини етказиб берилишини таъминлайди;
  • Давлат МТТларни дезинфекциялаш ва тозалаш воситалари, қўллар учун зарурий антисептик воситалар билан таъминлайди.

Мактабгача таълим вазири Агриппина Шин карантин вақтида нечта МТМлари ва ходимлари фаолиятини тўхтатганини айтиб ўтди. Унга кўра, COVID-19 тарқалишининг олдини олиш мақсадида 2020 йилнинг 16 март куни Мактабгача таълим вазирлиги 14 мингта МТТлар, хусусан, 6 мингта давлат, 6,7 мингта оилавий, 753та хусусий ва 692 та ДХШ асосидаги МТТлар фаолиятини тўхтатган эди. Ходимлар тўланадиган меҳнат таътилига юборилди ёки масофавий ишлаш тартибига ўтказилди. Шу билан бирга, 9 фоиз ходимлар ўз хоҳишига кўра ҳақ тўланмайдиган таътилга чиқишган.

Фото: «Дарё»

«Шунингдек, болаларни МТМларига қабул қилишдаги электрон навбат фаолияти ҳам 2020 йилнинг ноябрь ойигача ишламай туради. Ҳозирча барча ҳаракатлар  МТТга қатнашни бошлаган тарбияланувчилар учун хавфсиз шароитлар яратишга йўналтирилган. Бугунги кунда гуруҳ учун тавсия қилинган болаларнинг максимал сони 15 нафарни ташкил этмоқда. Мактабгача таълим муассасалари мутахассислари пандемия шароитида ишлашни ўрганишлари, вазирлик эса кўникма орттириб, улардан хулоса чиқаришлари кўзда тутилмоқда. Бундан ташқари, аввалроқ алоҳида айтганимдай, 3 ёшли болалар ҳали ижтимоий масофа ва гигиена аҳамиятини тушунишмайди, бу эса улар ва атрофидагилар саломатлигини хавф остига қўйиши мумкин», — дея изоҳ беради мактабгача таълим вазири Агриппина Шин.