Душанбеда 14—15 сентябрь кунлари Шавкат Мирзиёев ва Эмомали Раҳмоннинг ўзбек-тожик муносабатларини мустаҳкамлашдаги ўрни муҳокама қилинади. Бу ҳақда Asia-Plus хабар бермоқда.
Қайд этилишича «Эмомали Раҳмон ва Шавкат Мирзиёевнинг Тожикистон ва Ўзбекистон ўртасидаги кўп қиррали ҳамкорлик ва дўстликни мустаҳкамлаш ва ривожлантиришдаги роли» мавзусидаги халқаро илмий-амалий конференция Тожикистон Миллий кутубхонасида бўлиб ўтади.
Унда Тожикистон ва Ўзбекистондан бўлган сиёсатшунослар, экспертлар, олимларнинг катта гуруҳи иштирок этади. Конференция якунларига кўра Тошкент ва Душанбеда у ерда қилинган маърузаларни ўз ичига олган ўзбек, тожик ва рус тилларидаги рисолалар нашр этилади.
Эслатиб ўтамиз, Тожикистонда 11 октябрь куни президентлик сайлови бўлиб ўтади. Душанбеда 26 август куни бўлиб ўтган Тожикистон Мустақил касаба уюшмалари федерациясининг навбатдаги қурултойида мамлакатнинг амалдаги президенти Эмомали Раҳмон президентлик сайловига номзод сифатида илгари сурилган.
Изоҳ (0)