Die Zeit: Навальнийни Россия махсус хизматидагилар заҳарлаган. У «Новичок»нинг янги тури таъсирида самолётда жон бериши керак эди

Россиялик сиёсатчи Алексей Навальнийга «Новичок» заҳарининг янги тури билан суиқасд уюштирилган. Мазкур модда аввалгиларига нисбатан хавфлироқ. Бу ҳақда Die Zeit нашри исмини ошкор этмаган манбаларига таяниб хабар тарқатди.

Навальнийни заҳарлаган кишилар уни самолётда ўлдиришни мақсад қилган. Сиёсатчи омадли тасодифлар занжири сабаб омон қолди — учувчининг тезкор ҳаракати ва самолётни қўндириши, шифокорларнинг беморга жуда тез атропин дорисини юборгани шулар жумласидан.

Die Zeit’нинг ёзишича бундай ўта янги заҳар иштирокидаги операцияни фақат Россия махсус хизматидагилар амалга ошириши мумкин. Оддий жиноятчилар бундай мураккаб ишни қила олмайди, шунингдек, хориж давлатларининг разведка хизматлари ҳам Россия ҳудудида мураккаб воқеани саҳналаштириши мантиққа тўғри келмайди, сабаби Навальний доимий равишда кузатувда бўлади.

«Бу ҳақиқатга яқинроқ шундай хулоса чиқаришга асос бўлади: айнан Кремль Навальнийни йўлдан четлатиш ҳақида буйруқ берган», — дейилади Die Zeit маълумотида.

Нашрнинг қайд этишича, немис шифокорлари заҳар қолдиқлари Навальний охирги марта сув ичган идишдан ва сиёсатчининг қўлларидан топилган. Германия ҳукумати сиёсатчини кузатиб юрган агентлардан бири ичида чой бўлган финжонга заҳарни солган бўлиши ёки модда чой дамланаётган вақтда идиш ичига солинган бўлиши мумкинлигини тахмин қилмоқда.

Россия ҳукуматининг расмий вакиллари Навальнийдан Омскда олинган таҳлиллар, унинг организмида заҳар бўлмаганини кўрсатган. Meduza ўтказган суриштирувга кўра, Омскда Навальнийнинг заҳарлангани юзасидан дастлабки ташхис қўйилган ва шу сабабли ҳам унга тез ёрдам машинасида шифохонага олиб кетилаётган вақтида атропин дориси юборилган.

Германия ҳукумати 2 сентябрда Бундесевердаги махсус лабораторияда ўтказилган ўрганишларда таҳлилларнинг Навальний организмида «Новичок» турига мансуб заҳар борлигини кўрсатганини расман эълон қилган. Шунингдек, Германия ҳукумати Россиядан ушбу вазият юзасидан тушунтириш беришни сўраган.

Германия канцлери Ангела Меркель Россия ҳукумати Навальний заҳарланиши билан боғлиқ жиддий саволларга жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона иш» деб атади. Вашингтон айбдорларга нисбатан молиявий чекловлар қўллашга ваъда берди.

Алексей Навальний 20 августдан буён кома ҳолатида эди. 7 сентябрда Берлиндаги «Шарите» клиникаси шифокорлари россиялик сиёсатчи Алексей Навальнийни тиббий кома ҳолатидан чиқарди ва секин-аста сунъий нафас олдириш аппаратидан ажратган. Унинг аҳволи Томск—Москва йўналиши бўйича учаётган рейс вақтида оғирлашиб қолган, самолёт фавқулодда Омскка қўнганди. Комадаги дастлабки икки кунни сиёсатчи Россиянинг Омск шаҳридаги клиникада ўтказди, шундан сўнг у Берлинга олиб кетилди. Сиёсатчининг сафдошлари ҳодисанинг бошидан буён унинг заҳарланганини айтиб келмоқда. Уларнинг гумон қилишича, россиялик шифокорлар сиёсатчининг организмида заҳар изини топиш қийин бўлиши учун уни атайлаб клиникада ушлаб турган ва кетишига рухсат бермаган бўлиши мумкин.

«Шарите» клиникаси шифокорлари Навальний етиб келганидан кейин икки кун ўтиб унинг холинестераза ингибиторлари гуруҳидан бўлган модда билан заҳарланганини маълум қилган.