Вазирлар Маҳкамасининг «Ўзбекистон Республикасида иқтисодий ўсишни тиклаш ва тизимли таркибий ўзгаришларни давом эттириш бўйича 2020—2021 йиллардаги амалий ҳаракатлар режаси» эълон қилинди.
Ҳужжатга кўра, импорт қилинаётган тайёр электротехника ва электромаиший техника маҳсулотларига утилизация йиғимини жорий этиш, электротехника маҳсулотлари ишлаб чиқарадиган етакчи хорижий компанияларни жалб қилиш кўзда тутилган.
Бундан ташқари, электротехника саноатида энергия ва бошқа ресурсларни тежайдиган технологияларни, шу жумладан, қайта тикланадиган энергия манбаларини жорий қилиш ва илғор технологияларни жорий этиш орқали энергия самарадорлигига эришиш, мудофаа саноатида янги авлод электротехника маҳсулотлари ва саноат жиҳозлари ишлаб чиқаришни ташкил этиш режалаштирилган.
Миллий бренд остида стандартлаштирилган трактор моделларини оммавий ишлаб чиқариш, «Lean менежмент», «Кайдзен», «5S», «Канбан» технология ва стандартлари асосида камхарж усулларда қишлоқ хўжалиги техникалари ишлаб чиқариш самарадорлигини ошириш ҳамда қишлоқ хўжалиги техникаларини ишлаб чиқариш унумдорлигини ошириш мақсадида, баъзи кам самарали корхоналар таркибини қайта қуриш ва бир турдаги техника ишлаб чиқаришга ихтисослаштириш ҳам мўлжалланмоқда.
Шу билан бирга, Кореянинг Илғор технологиялар институти (KAIST), Токио Илғор технологиялар институти (Япония), «Нанянг» технология университети (Сингапур), Цинхуа университети (Хитой) вакиллари билан музокаралар ўтказиш орқали давлат-хусусий шерикчилик тамойиллари асосида Тошкентда соҳани юқори малакали кадрлар билан таъминлаш мақсадида, электроника ва электротехника соҳасидаги мустақил ўқув юртини ташкил қилиш режалаштирилган.
Эслатиб ўтамиз, 2020 йил 1 августдан Ўзбекистонда айрим транспорт воситаларига утилизация йиғими жорий этилган эди.
Изоҳ (0)