Ўзбекистон давлат бюджети даромадлари январь—август ойларида 82,9 трлн сўмни ташкил қилди

Ўзбекистон давлат бюджети даромадлари 2020 йил январь август ойларида 82,9 триллион сўмни ташкил қилди, деб хабар бермоқда Молия вазирлиги.

Қайд этилишича, шундан 63,5 триллион сўм солиқ идоралари томонидан назорат қилинадиган тушумларга, 14 триллион сўм божхона идоралари томонидан назорат қилинадиган тушумларга тўғри келади. Давлат бюджетининг бошқа даромадлари 8,4 триллион сўмни ташкил қилади.

Тоғ-кон компанияларидан даромадлар жами 22,6 триллион сўмни (ёки умумий даромадларнинг 27,3 фоизини), жумладан фойда солиғи 11,1 триллион сўмни, ер қаъридан фойдаланганлик учун солиғи 7,6 триллион сўмни ва давлат улушига ҳисобланган дивидендлар кўринишидаги даромадлар 3,8 триллион сўмни ташкил қилди.

2020 йилнинг 8 ойи давомида фойда солиғи бўйича жами 17 триллион сўм ва ер қаъридан фойдаланганлик учун солиқ бўйича жами 10,4 триллион сўм келиб тушган.

Январь август ойларида қўшилган қиймат солиғи бўйича солиқ ва божхона идоралари томонидан жами 23 триллион сўм, жумладан солиқ идоралари томонидан 11,7 триллион сўм, божхона идоралари томонидан 11,2 триллион сўм ундирилган.

Шунингдек, 2020 йилнинг 8 ойи давомида қўшилган қиймат солиғи бўйича тўловчиларга 3 триллион сўм, жумладан I ярим йилликда 1,6 триллион сўм, июлда 577 миллиард сўм, августда эса 779 миллиард сўм маблағ қайтарилган.

Таъкидланишича, 1 июлдан бошлаб, қўшилган қиймат солиғи бўйича ҳисобга олинадиган миқдорининг ҳисобланган миқдордан ошиб кетган қисми, фақат «ноль» ставка қўллайдиганлар учун эмас, балки барча тоифадаги тўловчиларга қайтариладиган тартиб жорий қилинди.

Давлат бюджети даромадларининг айрим солиқлар бўйича йўқотишлари, қимматбаҳо металлар нархининг ошиб бориши натижасида тоғ-кон корхоналаридан қўшимча тушумлар, давлат корхоналаридан дивидендлар ҳамда давлат бюджетининг бошқа даромадлари ҳисобига қисман қопланади.

«Умуман олганда, 2020 йил январь август ойлари тушумлари асосида қилинган ҳисоб-китобларга кўра, жорий йил якунлари бўйича давлат бюджети тушумлари 125,8 триллион сўмни ёки ‘2020 йил учун Ўзбекистон Республикаси Давлат бюджети тўғрисида’ги қонунда кўзда тутилган прогнозга нисбатан 2,6 триллион сўм кам бўлиши кутилмоқда», — дейилади вазирлик хабарида.