«Миллий ТВ» маданий, мусиқий-кўнгилочар телеканали 2016 йил 4 август куни тест-синов режимида илк бор эфирга чиққан эди. Сентябрь ойидан эса телеканал кўрсатувлари тўлақонли равишда намойиш этила бошланди.
Фаолиятини 20 га яқин ходим билан бошлаган телеканал дастлаб Тошкент шаҳри ва пойтахт вилояти ҳудудини қамраган бўлса, кейинчалик, қисқа вақт ичида бутун Ўзбекистон бўйлаб туну кун эфирга чиқадиган бўлди.
Телеканал томонидан 2017 йил 8 сентябрда ташкил этилган «Ўзбегим» фестивалида дамланган 8 тонналик палов Гиннесснинг Рекордлар китобидан ўрин олди. Фестиваль доирасида «Ўзбегим» китоби чоп этилди.
Ўтган тўрт йилда «Ширчой», «МТВ-шоу», «Ҳолва», «Лаззат ошхонаси», «Оталар сўзи» каби лойиҳалар телеканал юзига айланди; пандемия даврида эфирга чиқа бошлаган «Тез ёрдам» эса аҳоли орасида коронавирус ваҳимасини енгишга кўмак берди.
Телеканал ўзбек шоу-бизнеси учун кенг майдонга айланди; кузатувчиларнинг қайд этишича, кўп йиллар «запрет»да бўлган Шерали Жўраев, Обид Асомов, Юлдуз Усмонова, Озода Нурсаидова каби санъаткорлар айнан «Миллий ТВ» орқали эфирга қайтди.
«‘Миллий ТВ’ Ўзбекистон замонавий, замон билан ҳамнафас мамлакат эканини дунёга, бой тарихий маданиятимиз ва қадриятларимизни юртдошларимизга намойиш этишни ўз олдига мақсад қилиб қўйган ва бундан кейин ҳам шу ниятини амалга оширишда давом этади», — дейилади телеканалнинг «Дарё»га тақдим этилган ахборотномасида.
Изоҳ (0)