Қашқадарё вилоятининг Китоб туманида тўрт нафар фарзанди учун алимент тўлаши белгиланган қарздор ота муаммони ўзгача усулда ҳал қилди. Бу ҳақда «Дарё»га Мажбурий ижро бюросининг Қашқадарё вилоят бошқармаси маълум қилган.
Фуқаролик ишлари бўйича Шаҳрисабз туманлараро судининг 2020 йил 21 июндаги қарорига асосан отадан тўрт нафар вояга етмаган фарзандлари таъминоти учун алимент ундириш белгиланган. Бироқ ота мажбуриятини етарли даражада бажармаганлиги оқибатида алиментдан қарздорлик вужудга келган.
Мажбурий ижро бюроси Китоб туман бўлими ходимлари фарзандлари учун алимент тўламай юрган эркакка ҳуқуқий тушунтиришлар берган. Улар қарздорлик бартараф этилмаса, ота маъмурий ёки жиноий жавобгарликка тортилиши мумкинлигини айтган.
Муаммони ечиши кераклигини яхши тушунган К.М. фарзандлари 18 ёшга тўлгунча бўлган алимент қарзидан бир зумда қутулди. У алимент тўлови ўрнига ундирувчига ўз номидаги Damas машинасини таклиф қилди.
«А.С. таклифни қабул қилгач, машина унинг номига ўтказиб берилди. Шунинг билан ижро ҳужжати амалда таъминланди», — дейилади хабарда.
Аввалроқ Тошкент шаҳрида МИБ 126 миллион сўмлик алимент пулини ундириб берилгани, Бухорода вояга етмаган фарзандлари учун алимент тўламай келган она ўз номидаги уйни ўғилларидан бирининг номига расмийлаштириб бергани, Сурхондарё вилояти Денов туманида яшовчи ота фарзанди учун 18 ёшга тўлгунига қадар тўлаши керак бўлган алимент пулини аввалдан тўлаб қўйгани ҳақида хабарлар берилган.
Изоҳ (0)