Самарқанддаги Трамвай линияларини эксплуатация қилиш дирекцияси мансабдорлари 1,2 млрд сўмни ўзлаштиргани аниқланди

Самарқанд шаҳар ҳокимлиги қошидаги «Трамвай линияларини эксплуатация қилиш дирекцияси» давлат корхонаси мансабдор шахслари 1,2 миллиард сўм маблағни ўзлаштиргани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти Самарқанд вилоят бошқармасига таяниб, «Zarnews» хабар берди.

Ҳолат юзасидан ўзлаштириш ёки растрата йўли билан талон-торож қилиш ҳамда жиноий фаолиятдан олинган даромадларни легаллаштириш билан боғлиқ жиноят иши очилган. Жиноятни очишда иқтисодий жиноятларга қарши курашиш департаменти ҳамда ДХХ вилоят бошқармалари ходимлари томонидан тўпланган ҳужжатлар асос бўлган.

Аниқланишича, Самарқанд шаҳар ҳокимлиги қошидаги «Трамвай линияларини эксплуатация қилиш дирекцияси» давлат корхонаси мансабдор шахслари 2017—2019 йиллар давомида олдиндан тил бириктириб, бир гуруҳ бўлиб, корхонанинг 74,6 миллион сўм маблағини хизмат сафари учун асоссиз чиқим қилган.

Бундан ташқари, ходимларнинг иш ҳақига асоссиз равишда 235,8 миллион сўм қўшиб ёзилган ҳамда банкдан иш ҳақи учун олинган 112,3 миллион сўм ходимларга тарқатилмаган.

Корхона мансабдорлари корхонада ишламаган фуқароларнинг контракт тўлови ва бошқа харажатлари учун 137 миллион сўм маблағ ўтказган. Бошқа корхоналарга молиявий ёрдам сифатида 62,5 миллион ҳамда корхонанинг корпоратив картасидан 636,1 минг сўм асоссиз чиқим қилинган.

Мансабдорлар давлат корхонасининг жами 1,258 миллиард сўм маблағини ўзлаштириш ва растрата қилиш йўли билан талон-торож қилган.

Бундан ташқари, «Трамвай линияларини эксплуатация қилиш дирекцияси» давлат корхонаси мансабдор шахслари давлат корхонаси мулкини ўзлаштириш йўли билан қўлга киритган маблағларининг 232,4 миллион сўмини Самарқанд шаҳар Ал-Хоразмий кўчасида қурилган кўп қаватли уйдан 3 хонали хонадонни сотиб олиш учун «М.Д.Б» МЧЖга ўтказиб берган. Яъни, жиноий фаолиятдан олган даромадлар легаллаштирилган.

Ҳолат юзасидан департаментнинг вилоят бошқармаси томонидан «Трамвай линияларини эксплуатация қилиш дирекцияси» давлат корхонаси мансабдор шахсларига нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш) ва 243-моддаси (жиноий фаолиятдан олинган даромадларни легаллаштириш) билан жиноят иши қўзғатилган.