Самарқанд вилояти Оқдарё туманида йўловчи ташиш билан шуғулланувчи икки ҳайдовчи ўртасида юз берган жанжал улардан бирининг ўлимига сабаб бўлди. Бу ҳақда Тергов департаменти хабар берди.
Маълум қилинишича, 2020 йилнинг 30 август куни соат 11:00 да Оқдарё туманида 24 ёшли О.С. ўзига олдиндан таниш бўлган 27 ёшли Ш.Т. билан автомашинада йўловчи ташиш масаласида жанжаллашиб қолган ва турли хил ножўя сўзлар билан бир-бирини ҳақорат қилган.
Шундан сўнг О.С. таниши Ш.Т. билан келиб чиққан низони ҳал қилиш мақсадида, шу куни соат тахминан 18:30 да Ш.Т.нинг уйига келиб, туманнинг «Уклон» қишлоғида жойлашган 36-сонли ўрта таълим мактабининг футбол майдонида яккама-якка уришишга келишиб олган. Ушбу спорт майдонида О.С. Ш.Т.га уни ҳақорат қилганлигини рўкач қилиб, бир неча бор қўли билан Ш.Т.нинг юз соҳасига уриб, танасининг турли жойларига тепиб, тан жароҳати етказган. Натижада Ш.Т. ҳушидан кетиб, йиқилган. О.С. эса ҳодиса жойидан кетиб қолган.
Ҳодиса жойида бўлган Ш.М., Ш.I. ва Ш.Х. ҳушидан кетиб йиқилган Ш.Т.ни ҳушига келтириш мақсадида юзига сув сепган. Улар Ш.Т.нинг нафас олишини эшитиб, йўлдан ўтиб кетаётган Nexia-2 машинасини тўхтатиб, Ш.Т.ни тез ёрдам бўлимига олиб борган. Шифокорлар томонидан кўрсатилган тиббий муолажаларга қарамасдан, Ш.Т. олган тан жароҳатлари натижасида шифохонада вафот этган.
Республика шошилинч тез ёрдам маркази Самарқанд филиалининг тиббий маълумотномасига кўра, Ш.Т.нинг танасида ёпиқ бош мия жароҳати, бурун суягининг синиши, бош юмшоқ тўқималари остига қон қуйилиши, бош мия пардалари остига ва тўқимасига қон қуйилиши, бош миянинг лат ейиши, чап кўз пардасига қон қуйилиши аниқланган. Ш.Т. ушбу олган тан жароҳатлари оқибатида вафот этганлиги кўрсатилган.
Мазкур ҳолат юзасидан Оқдарё тумани ИИБ ҳузуридаги Тергов бўлими томонидан О.С.га нисбатан Ўзбекистон Республикаси Жиноят кодексининг 104-моддаси 3-қисми «д» банди (жабрланувчининг ўлимига олиб келган қасддан баданга оғир шикаст етказиш) билан жиноят иши қўзғатилган.
Жинояти иши бўйича О.С.айбланувчи тариқасида жалб қилиниб, унга нисбатан қамоққа олиш тарзидаги эҳтиёт чораси қўлланилган.
Изоҳ (0)