Ўзбекистон халқ табобатини ривожлантириш бўйича Хитой билан ҳамкорлик қилади

Соғлиқни сақлаш вазири Алишер Шодмонов ҳозирда Ўзбекистонда бўлиб турган хитойлик шифокор ва мутахассислардан иборат делегация билан учрашди, дея хабар берди вазирлик ахборот хизмати.

Президент Шавкат Мирзиёевнинг 2019 йил апрель ойидаги Хитойга ташрифи давомида турли соҳалар билан бирга соғлиқни сақлаш тизимини янада ривожлантириш бўйича ҳам қатор келишувларга эришилган. Учрашув давомида ушбу саъй-ҳаракатлар самараси ўлароқ, ҳозирги пандемия билан боғлиқ вазиятда икки давлат ўртасида ушбу йўналишда ҳамкорлик янада ривожланиб бораётгани қайд этилган.

Мулоқотда хитойлик мутахассисларнинг Ўзбекистон тиббиёт ходимлари билан ҳамкорликда COVID-19 пандемияси кенг тарқалишининг олдини олиш, уни назорат қилиш ва даволаш борасида олиб борилаётган саъй-ҳаракатлари эътироф этилган.

Маълум қилинишича, хитойлик мутахассислар Ўзбекистонда коронавирус пандемиясига қарши курашда яхши натижаларга эришилаётганлиги, шунингдек, халқ табобати борасида яхши анъаналар шакллангани, айниқса, Абу Али ибн Сино илмий мероси, асарлари Хитойда ҳам қўлланма сифатида кенг фойдаланилишини эътироф этган.

Учрашув доирасида Ўзбекистон Соғлиқни сақлаш вазирлиги ҳамда Beizhong Yilin Pharm Tech (Beijing) Co. Ltd. фармацевтика компанияси ўртасида халқ табобатини ривожлантириш, бу борада илмий изланишлар олиб бориш ҳамда ўзаро ҳамкорликни яна-да кенгайтириш бўйича шартнома ҳам имзоланди. Унда мамлакатда халқ табобатини ривожлантириш борасида қатор вазифалар белгиланди.

Жумладан, ўзбек ва хитой халқ табобатини ўзаро уйғунлаштириб, соҳада қўшма лойиҳаларни ишлаб чиқиш ва амалга ошириш, табобатдан ҳам ташхис қўйишда, ҳам даволашда унумли фойдаланиш, шунингдек, мамлакатда яқин ойларда Хитой халқ табобати марказини очиш, мутахассисларни коронавирусга қарши курашда Хитой тажрибаси бўйича ўқитиш, малакасини ошириш каби йўналишлар мавжуд.

Учрашув сўнгида хитойлик мутахассислар томонидан COVID-19 га қарши Хитойда муваффақиятли қўлланилган анъанавий хитой табобати усулида тайёрланган дори воситаларининг дастлабки қисми тақдим этилди.