Андижон вилоятининг Хўжаобод туманида тўрт ёшли қизини доимий равишда калтаклаб келган ва унинг ўлимига сабабчи бўлган онага суд ҳукми ўқилди. Бу ҳақда «Дарё» мухбири Умиджон Мамарасулов хабар берди.
Жиноят ишлари бўйича Андижон вилоят суди судья катта ёрдамчиси Комроншоҳ Расуловнинг маълумот беришича, 1995 йилда туғилган Г.Ҳ. тўрт ёшли қизи А.ни ўзи эркин юра олмаслиги, шўх бўлиб катта бўлаётганини рўкач қилиб, 2020 йил 21 апрелдан 29 апрелга қадар унинг боши ва танасининг бошқа қисмларига уриб, доимий калтаклаб келган.
Судда сўз олган 25 ёшли она ўз айбига қисман иқрор бўлиб, фарзанди А. билан 2020 йил 21 апрелдан бошлаб, яқин таниши Сарвиноз Қамбарова (исм-фамилия ўзгартирилган)нинг хонадонида яшаб келганини, қизи танишининг уйида тўғри келган жойга ҳожат чиқариб қўя бошлагани сабаб жаҳли чиқиб, уни урганини маълум қилган.
25 ёшли она, шунингдек, 2020 йил 28 апрель куни соат 18:00 да таниши Сарвинознинг хонадонидан чиқиб, қизи А.ни кўтарган ҳолда кўча айланганини, ўша куни ухламагани сабаб 29 апрель куни соат 10:00 да Андижон шаҳар 1-кичик даҳадан ўтиб кетаётганида ҳолдан тойиб, боши айланиб қўлидаги фарзанди билан ерга йиқилганини айтган.
Таъкидланишича, ўрнидан турган она фарзандини қўлига олганда у ҳушидан кетгани маълум бўлган. Ҳушидан кетган тўрт ёшли қизалоқ шифохонага олиб борилган. 2020 йилнинг 6 май кунига қадар даволанган қизалоқ олган тан-жароҳатлари оқибатида ўша куни вафот этган.
Суд Г.Ҳ.ни Жиноят кодексининг 104-моддаси 3-қисми «д» банди (жабрланувчининг ўлишига сабаб бўлган оғир шикаст етказиш) билан айбли деб топиб, уни 4 йил муддатга озодликдан маҳрум қилган. Бироқ, айбдор ҳомиладор бўлганлиги сабабли тайинланган жазони ижро қилиш Жиноят процессуал кодексининг 533-моддаси 1-қисмининг 2-бандига (ҳукмнинг ижросини кечиктириш) асосан бир йилга кечиктирилган.
Изоҳ (0)