Халқ таълими вазирлиги томонидан 2020/2021-ўқув йилининг 1-чораги учун умумтаълим мактабларининг пандемия шароитига мослаштирилган намунавий дарс жадвали ишлаб чиқилди.
Вазирлик хабарида қайд этилишича, мазкур дарс жадвали асосида умумтаълим мактабларининг навбатлилиги (сменаси), ўқувчи ўрни, синфлар ва ўқитувчилар сонидан келиб чиқиб, ушбу намунавий жадвалга мослаштирилган ҳолда дарс жадвалини тузиш тавсия этилади.
Дарс жадвалини тузишда бир неча талабларга эътибор қаратилади. Жумладан, бир вақтнинг ўзида ўқувчилар кўп тўпланмаслиги ва тирбандликнинг олдини олиш учун дарс машғулотларининг бошланиш вақти турли соатларга белгиланади (бошланғич синфлар учун 8:00 да, 5—8-синфлар учун 8:30 да, 9—11 синфлар учун 9:00 да).
Ўқувчиларнинг соғлиғини ҳимоялаш, ижтимоий масофани сақлаган ҳолда ортиқча мулоқотнинг олдини олиш мақсадида, жисмоний тарбия, чақириққа қадар бошланғич ҳарбий тайёргарлик, мусиқа маданияти, тасвирий санъат ва чизмачилик, технология ҳамда тарбия фанлари ўқув йили бошида вақтинчалик ўтилиши тавсия этилмайди. Ушбу фанлар масофавий таълим шаклидаги телевизион дарслар орқали ўзлаштириб борилади. Таъкидланишича, мазкур фанлардан дарс бераётган ўқитувчиларнинг ойлик иш ҳақи тўлиқ сақлаб қолинади ва улар мактабдаги ўқув-тарбия жараёнини ташкил этиш билан боғлиқ ташкилий масалаларга жалб этилади.
Танаффус вақтларида санитар-гигиеник талабларга риоя этиш, ижтимоий масофани сақлаш ва ўқувчиларнинг ўзаро мулоқотини чеклаш мақсадида дарслар оралиғида қўнғироқ чалиш тавсия этилмайди, танаффус вақтларида ўқувчилар тўпланишига йўл қўйилмайди.
Дарслар орасида 5 дақиқалик танаффус берилади, шунингдек, бошланғич синфда 2-соат дарсидан кейин, 5—11-синфларда 3-соат дарсидан кейин 10 дақиқалик катта танаффус, сменалар оралиғида эса 30 дақиқа тозалаш учун вақт берилади.
Масофавий шаклда таълим олаётган ўқувчилар учун телевизион дарслар жадвали 10 сентябрдан бошлаб вазирликнинг расмий сайти ва ижтимоий тармоқдаги саҳифалари орқали эълон қилиб борилади.
Эслатиб ўтамиз, Ўзбекистон мактабларида янги ўқув йили 14 сентябрдан бошланади. Ўқувчилар мактабга бориши ёки онлайн ўқиши мумкин. Давлат мактабларида янги ўқув йилида мажбурий мактаб формаси талаб қилинмайди. Шунингдек, дарслар таклиф этилганидек 30 дақиқа эмас, балки анъанавий 45 дақиқа ўтиладиган бўлди.
Аввалроқ Халқ таълими вазирлиги санитария талабларига жавоб бермайдиган мактаблар ўқишни масофавий тарзда олиб боришини маълум қилгани, мактабларда таълим икки хил шаклда бўлишини инобатга олиб, ўқувчиларнинг ота-оналарига мурожаат билан чиққани хабар берилган эди. Вазирлик, шунингдек, ўқув йили бошида айрим фанларни вақтинчалик ўтмасликни тавсия қилди.
Изоҳ (0)