Об-ҳаво шароитлари сабабли Туркманистоннинг Лебоп вилоятида ғўза билан банд бўлган майдонларнинг тахминан 60 фоизига экин қайта экилган. Шу сабабли пахта теримининг бошланиши номаълум муддатга қолдирилди. Бу ҳақда »Хроника Туркменистана» хабар берди.
Қайд этилишича, терим мавсуми ортга сурилганига қарамасдан вилоятдаги Саидий номидаги педагогика институти талаблари ва бир неча лицей ўқувчилари пахта теримига бориши зарурлиги ҳақида огоҳлантирилган. Талабалар вилоятнинг узоқ туманларига олиб кетилади.
Талабалар ва бюджет ташкилотлари ходимлари 2020 йилда коронавирус пандемияси сабабли аҳолини пахта теримига оммавий жўнатиш бекор қилинишига умид билдирганди, бироқ бу юз бермади.
Туманлардаги қишлоқ хўжалиги бирлашмалари раҳбарлари қарши чиқишига қарамасдан ҳудудлар раҳбарлари талабалар ва давлат идоралари ходимларини қўшимча иш кучи сифатида пахта теримига жўнатади. Пахта ишлаб чиқарувчиларнинг ўзлари ҳам бундай ёрдамни хоҳламайди. Бу улар учун ортиқча харажат ва ишларни юзага келтиради.
Аввалроқ Туркманистоннинг Сарҳадобод шаҳрида писта теришга жўнатилган 11 нафар аскар ҳалок бўлгани ҳақида хабар берилганди.
Изоҳ (0)