Байрутдаги портда бир ой аввал содир бўлган йирик портлаш оқибатида вайрон бўлган Мар Михаил ҳудудидаги бино харобалари остида ҳаёт аломатларини қайд этилди, деб ёзмоқда «РИА Новости» Ливан фуқаролик мудофааси волонтёри, қидирув-қутқарув операцияси аъзоси берган маълумотга таяниб.
Унинг айтишича, ушбу ҳудуд аҳолиси бинодан чиққан кучли ҳид туфайли фуқаро муҳофазасига мурожаат қилган. Уларда махсус ускуналар бўлмагани сабабли Ливанда ишлаётган бир гуруҳ қутқарувчилардан ёрдам сўралган. Итлар қурбонлар жасади ётгани тахмин қилинган жойни топган. Шундан сўнг махсус ускуна ҳаёт аломатларини қайд этган.
«Биз бу жойни ўраб олиб, сукут сақлашга чақирдик ва ускуна дақиқасига 20 марта юрак уришини кўрсатди. Бу одам эканлигига шубҳам бор. Эҳтимол, қандайдир ҳайвон бўлса керак», — деган волонтёр.
Агентлик суҳбатдошининг айтишича, қутқарувчилар ҳаётига таҳдид соладиган катта бетон сексияларини олиб ташлайдиган техника келишини кутиб қутқарув ишлари соат 23:30 да вақтинча тўхтатилган. Соат 1:30 дан бошлаб ҳозирги пайтгача қидирув-қутқарув ишлари давом этмоқда.
Портлаш 4 август куни содир бўлган. Ҳодиса 2014 йилда Грузиядан Мозамбикка юк олиб кетаётган россиялик тадбиркор Игор Гречункинга тегишли кемадан мусодара қилинган 2750 тонна оғирликдаги аммиак селитраси портлаши оқибатида содир бўлган. Ливан бош вазири Байрутдаги мазкур портлашга узоқ йиллар давом этган коррупция ҳолатлари сабаб бўлганини айтган.
Ҳодиса оқибатида Байрут шаҳрининг деярли ярми қисман ёки тўлиқ вайрон бўлган, 300 минг нафар одам уйсиз қолган. Сўнгги маълумотларга кўра портлаш туфайли 190 киши ҳалок бўлган, 6500 нафар одам турли жароҳатлар олган.
БМТ портдаги портлаш туфайли Ливан аҳолисининг ярми очликдан қийналиши мумкинлигини маълум қилган. Портдаги портлаш оқибатида етказилган зарар миқдори 15 миллиард доллардан ортиққа баҳоланмоқда.
Изоҳ (0)