Туркманистон президенти Гурбангули Бердимуҳамедов шу ҳафта мамлакат хавфсизлик кенгаши учун сайёр йиғилиш ўтказди, деб ёзмоқда «Хроника Туркменистана». Йиғилишдан сўнг президент ҳарбийлар ва ҳуқуқни муҳофаза қилиш идоралари раҳбарлари учун отиш машқлари ўтказди.
«Ҳарбий ва ҳуқуқни муҳофаза қилиш идоралари раҳбарлари навбатма-навбат нишонга ўқ узиб, қурол ишлатиш маҳоратларини намойиш этдилар. Президент урилган нишонларни кўриб чиқди ва турли хил қуроллардан фойдаланиш кўникмаларини оширишни буюрди», — деб ёзмоқда «Туркменистан сегодня» нашри.
Шундан сўнг президент шахсан ўзи ҳарбий қуролдан моҳирона фойдаланишини намойиш қилиб, икки хил тўппончадан нишонга ўқ узди. Кейин эса йўлтанламас машина томига ўрнатилган пулемёт — «Миниган»дан яқин атрофда турган бочкаларга қарата отган ва уни портлатган.
Бердимуҳаммедов йиғилганларга қарата «жанговар вазифаларни муваффақиятли бажариш учун мунтазам равишда ҳарбий-амалий спорт турлари билан шуғулланиш зарурлиги»ни таъкидлаган.
Қайд этиш жоизки, Бердимуҳамедов бир нечта қобилиятлари билан машҳур. 2018 йилнинг ноябрь ойида Туркманистон президенти ҳукумат мажлисида ўзининг штанга кўтариш маҳоратини намойиш этган, декабрь ойида эса набираси билан уч тилда қўшиқ куйлаган. 2019 йилнинг апрелида эса президент от ҳақида реп куйлади. 2020 йилнинг Янги йил базмида дижейлик қилиб, бир қатор куй-қўшиқларни ижро этди.
2019 йилнинг июнида у миллий армияни тўсатдан текширишга қарор қилган ва ярим кечаси алоҳида ҳарбий бўлинмани жанговар тайёргарликка келтиришни буюрган. Ўзи ҳам мерганлик маҳоратини намоён этиб, велосипедга ўтириб, нишонга қарата ўқ узган.
2020 йилнинг августида Гурбангули Бердимуҳамедов ўзининг 53-китобини ёзиб тугатди.
Изоҳ (0)