3 сентябрь куни Илон Маскнинг SpaceX компанияси орбитага яна 60 та янги Starlink сунъий йўлдошини чиқарди. Сўнгги бир ой ичида SpaceX 180 та аппарат учириб, тарихда бирор-бир компания ўрнатмаган натижани қайд этди, деб ёзади Inc.
Бу 2019 йилнинг майидан буён Starlink сунъий йўлдошлар гуруҳининг орбитага 12-бор учирилиши ҳисобланади. Falcon 9 ракета-ташувчиси Канаверал саҳросидаги космодромдан учирилган. Орадан саккиз дақиқа ўтгач, ракета-ташувчи Of Course I Still Love You сузувчи платформасига келиб қўнган.
SpaceX’нинг тасдиқлашича, 60 та сунъий йўлдошнинг барчаси орбитага муваффақиятли чиққан. Шундай қилиб, компания космик аппаратларни учириш тезлиги бўйича жаҳон рекордини ўрнатди. Starlink’нинг 58 та сунъий йўлдошдан иборат олдинги партияси 18 август куни учирилганди.
Айни вақтда Ер орбитасида 650 та SpaceX космик аппарати учиб юрибди. Сентябрь ойига яна иккита парвоз режалаштирилган.
Компания ўта юқори тезликдаги интернетни таъминлаш учун орбитага яна 42 мингта Starlink сунъий йўлдошини учириши керак. Лойиҳани амалга ошириш учун керак бўладиган инвестиция миқдори 10 миллиард долларга баҳоланган.
Бошқа компаниялар ҳам худди шу каби дастур устида иш олиб бормоқда. Масалан, Британиянинг OneWeb компанияси орбитага 74 та сунъий йўлдошни учиришга уринган ёки Amazon компанияси Алоқа бўйича федерал комиссиядан 3,2 минг дона Kuiper сунъий йўлдошини учириш учун рухсат олган.
Аввалроқ Илон Маскнинг глобал интернет тезлиги тест вақтида 11—60 Мбит/сония кўрсаткични қайд этганди.
Изоҳ (0)